काठमाडौं । नेपाल राष्ट्र बैंकले चालू आर्थिक वर्षको मौद्रिक नीति आज सार्वजनिक गर्ने तयारी गरेको छ ।
शुक्रबार बिहान बस्ने सञ्चालक समितिबाट पारित गरेर दिउँसो मौद्रिक नीति सार्वजनिक गरिने राष्ट्र बैंकले जनाएको छ । राष्ट्र बैंक व्यवस्थापन समितिको बैठकले अघि मात्र मौद्रिक नीतिको दफाबार छलफल गरिसकेको छ ।
सरकार परिर्वतन भएपछि तयारी अवस्थामा रहेको मौद्रिक नीति पनि सार्वजनिक हुन सकेको थिएन् । नयाँ सरकारले अघिल्लो सरकारले ल्याएको बजेट प्रतिस्थापन गरी नयाँ बजेट ल्याउने बताइएसँगै मौद्रिक नीति ल्याउन ढिला गरिएको थियो ।
राष्ट्र बैंकले बुधबार मौद्रिक नीतिको अन्तिम तयारीबारे अर्थमन्त्रालयलाई ब्रिफिङ समेत गरिसकेको छ । राष्ट्र बैंकले कोभिडको दोस्रो र तेस्रो लहरबाट प्रभावित ऋणीलाई विशेष सुविधासहित मौद्रिक नीति सार्वजनिक गर्न लागेको बताइएको छ ।
यस्तै, मौद्रिक नीतिमा वित्तीय स्थायित्व, वाणिज्य बैंकबाहेकका वित्तीय संस्थाको पूँजी वृद्धि लगायत योजना रहेको बताइएको छ । सेयर बजारलाई प्रत्यक्ष प्रभाव पार्ने नीति नआउने राष्ट्र बैंकका अधिकारीहरुले जनाएका छन् ।
