काठमाडौं । कोरोना विरुद्धको खोपको व्यवस्था नगरेसम्म ट्यांकर चालकहरूले इन्धन ढुवानी नगर्ने भएका छन्।
नेपाल पेट्रोलियम ट्यांकर चालक संघले सरकारले ट्यांकर चालकहरुलाई खोपको व्यवस्था नगरेसम्म इन्धन ओसार–पसार नगर्ने जनाएको हो ।
‘कोरोनका कारण केही चालक तथा मजदुरको मृत्यु समेत भइसकेको र धेरै चालक संक्रमित भएका छन्,’ अध्यक्ष ईश्वर लामाद्धारा जारी विज्ञप्तिमा भनिएको छ, ‘हामीले पटक-पटक खोपको माग गर्दा खोप पाएनौं । अब खोपको व्यवस्था नभएसम्म इन्धन ढुवानी गर्दैनौं ।’
खोपको माग गर्दै चालकहरुले आजदेखि थानकोट डिपोबाट तेल ढुवानी गरेका छैनन् । यसअघि, नेपाल पेट्रोलियम डिलर्स राष्ट्रिय एसोसिएशनले पेट्रोलियम व्यवसायी र कर्मचारीलाई खोपको व्यवस्थापन गरिदिन सरकारसँग आग्रह गरेको थियो ।
सङ्घले अत्यावश्यक सेवालाई पुनः सञ्चालन गर्न अग्रपङ्क्तिमा रही कार्य गर्ने पेट्रोलियम व्यवसायीले खोप नपाएको जनाउँदै उपलब्ध गराउन आग्रह गरेको हो ।
