भारतमा पेट्रोलको मूल्य बढेको बढ्यै, प्रतिलिटर १६६ पुग्यो, नेपालमा कस्तो पर्ला असर ?
चाणक्य पोष्ट
प्रकाशित : 5:10 pm, बुधबार, जेठ २६, २०७८

काठमाडौं । पछिल्लो समय भारतमा लगातार पेट्रोलियम पदार्थको मूल्यवृद्धि हुन थालेको छ । प्रायः दैनिकजसो मूल्यवृद्धि गर्दै आएको भारतले बुधबार पनि पेट्रोल र डिजेलको भाउ बढाएको हो ।

 

बुधबार भारतमा पेट्रोलको मूल्य प्रतिलिटर १०३.७१ भारतीय रुपैयाँ (१६५.९३ नेपाली रुपैयाँ)सम्म पुगेको छ । इन्डियन आयल कर्पोरेशनका अनुसार बुधबार भारतको भोपाल सहरमा पेट्रोलको मूल्य प्रतिलिटर १०३.७१ भारु पुगेको छ ।

 

यस्तै, बुधबार मुम्बइमा पेट्रोलको मूल्य प्रतिलिटर १०१.७६ भारु (१६२.८१ नेपाली रुपैयाँ), जयपुर १०२.१४ भारु पुगेको छ । राजधानी नयाँ दिल्लीमा पनि प्रतिलिटर १०० भारु नजिक पुगेको छ । बुधबार दिल्लीमा पेट्रोल प्रतिलिटर ९५.५६ भारु पुगेको छ भने अन्य अधिकांश सहरमा पनि भारु १०० नजिक पुगेको छ ।

 

सरकारी स्वामित्वका इन्डियन आयल कर्पोरेसन, बिपिसिएल र एचपिसिएलले गत वर्षको मार्च यता पेट्रोलमा प्रतिलिटर भारु २६.५८ र डिजेलमा भारु २२.१८ ले वृद्धि गरिसकेका छन् ।

 

अन्तर्राष्ट्रिय बजारमा लगातार कच्चा तेलको मूल्यमा वृद्धि भएसँगै भारतमा पनि लगातार मूल्य वृद्धि भएको हो । हाल भारतले ८५ प्रतितभन्दा बढी पेट्रोलियम पदार्थ अन्तर्राष्ट्रिय बजारबाटै आयात गर्दै आएको छ ।

 

भारतमा लगातार पेट्रोलियम पदार्थ मूल्य वृद्धि भएपछि नेपालमा पनि त्यसको प्रभाव पर्ने देखिन्छ । नेपाल आयल निगमले हरेक १५ दिनमा इन्डियन आयल कर्पोरेशनले पठाएको मूल्य अनुसार नेपालमा पनि भाउ बढाउँदै आएको छ ।

 

निषेधाज्ञा यतामात्रै दुई पटक भाउ बढाइसकेको निगमले भारतबाट महँगोमा आयात गर्नुपर्ने भएपछि आगामी दिनमा पनि भाउ बढाउने नै सम्भावना देखिन्छ ।