काठमाडौं । सरकारले नेपाल विद्युत प्राधिकरणलाई पब्लिक कम्पनी बनाउने भएको छ । प्राधिकरणलाई पब्लिक कम्पनी बनाएर सर्वसाधारणलाई सेयर दिने तयारी सरकारले गरेको हो ।
उर्जा जलस्रोत तथा सिंचाइमन्त्री वर्षमान पुनले प्राधिकरणलाई पब्लिक कम्पनी बनाएर सर्वसाधारणलाई सेयर दिने गृहकार्य अगाडि बढेको जानकारी दिए । उर्जा जलस्रोत तथा सिंचाइ मन्त्रालयले नेपाल विद्युत प्राधिकरण ऐनलाई संशोधनको प्रक्रिया शुरु गरेको छ । सो ऐन संशोधन भएर आएपछि प्राधिकरण कम्पनी ढाँचामा रुपान्तरण हुनेछ ।
‘नेपाल टेलिकमजस्तै सर्वसाधारणलाई समेत लगानीका लागि प्रेरित गर्ने योजनामा प्राधिकरण छ । प्राधिकरणलाई थप प्रतिस्पर्धी बनाउने लक्ष्यका साथ आम नागरिकलाई समेत सेयरधनी बनाउने योजनामा मन्त्रालय लागेको मन्त्री पुनले बताएका छन् ।’
प्राधिकरणले करिब २ वर्ष अगाडि आफ्नो वित्तीय पुनसंरचना योजना पारित गरेको थियो । सोही योजना अनुसार प्राधिकरणको २५ प्रतिशत सेयर सर्वसाधारणलाई विक्री गर्ने सरकारी तयारी हो ।
प्राधिकरणको कार्यकारी निर्देशक हुनुअघि कुलमान घिसिङ प्राधिकरणकै सहायक कम्पनी चिलिमे जलविद्युत आयोजनाको प्रमुख थिए । चिमिलेमा सफलतापूर्वक काम गरेपछि नै उनलाई प्राधिकरणको नेतृत्व दिइएको थियो ।
प्राधिकरणका सहायक कम्पनीले निर्माण गरिरहेका आयोजनामा सर्वसाधारणको लगानी पनि छ । माथिल्लो तामाकोशी, रसुवागढी, साञ्जेन, मध्यभोटेकोशी जस्ता आयोजनामा सर्वसाधारणको सेयर छ ।
आर्थिक वर्ष २०७४/७५ मा २ अर्ब ९० करोड रुपैयाँ नाफा कमाएको प्राधिकरणले २०७५/७६ मा नाफालाई १४९ प्रतिशतले वृद्धि गरी ७ अर्ब २० करोड रुपैयाँ पुर्याएको छ ।
प्राधिकरणले आव २०७५/७६ मा सरकारको ढुकुटीमा १ अर्ब रुपैयाँ, विगतका वर्षको ब्याजसमेत १३ अर्ब १६ करोड रुपैयाँ र रोयल्टीबापत १ अर्ब ४४ करोड रुपैयाँ गरी १५ अर्ब ५९ करोड रुपैयाँ जम्मा गरेको छ ।
यस्तै चुहावट घटाउनेतर्फ पनि प्राधिकरणले उल्लेख्य सफलता हासिल गरेको छ । आव २०७२/७३ मा कूल चुहावट २५.८ प्रतिशत रहेकामा ३ वर्षभित्र १०.४६ प्रतिशतले घटाई १५.३२ प्रतिशतमा सीमित गर्न सफल भएको छ ।
प्राधिकरणको सञ्चित घाटा भने अझै १५ अर्ब रुपैयाँको हाराहारी रहेको छ । सरकारलाई उक्त घाटाको अपलेखन गरिदिन प्राधिकरणले आग्रह गर्दै आएको छ । यो घाटा अपलेखन भएपछि सर्वसाधारणलाई सेयर विक्री गर्ने तयारी प्राधिकरणको हो । रासस
