काठमाडौं । निषेधाज्ञाका कारण बैंकहरुको निक्षेप संकलन र कर्जा प्रवाह दुवै प्रभावित भएको छ । महामारीकै बेला समग्र अर्थतन्त्र ठप्प जस्तै भएपछि बैंकहरुको व्यापार पनि सुस्त भएको हो ।
नेपाल बैंकर्स संघका अनुसार बैंकहरुले जेठको तीनसाता (२१ गतेसम्म) २३ अर्ब कर्जा लगानी गरेका छन् । बैंकहरुले जेठको पहिलोसाता ६ अर्ब, दोस्रोसाता ९ अर्ब र तेस्रो साता ८ अर्ब ऋण लगानी गरेका हुन् ।
निषेधाज्ञाका कारण वाणिज्य बैंकहरुको निक्षेप संकलन भने प्रभावित भएको छ। दुईसाताको अवधिमा बैंकहरुले समग्रमा १३ अर्ब मात्र निक्षेप संकलन गरेका छन् । पहिलोसाता ६ अर्ब निक्षेप संकलन गरे पनि दोस्रोसाता ५ अर्ब निक्षेप फिर्ता गरेका छन् भने तेस्रो साता १२ अर्ब निक्षेप संकलन गरेका छन् ।
जेठ तेस्रो सातासम्म बैंकको कुल निक्षेप ३९ खर्ब ६९ अर्ब रुपैयाँ रहेको छ भने कर्जा लगानी ३६ खर्ब ३४ अर्ब रुपैयाँ पुगेको छ।
