काठमाडौं। पछल्लो समय आक्रामक रुपमा शाखा र कारोबार विस्तार गर्दा गर्दै लगेको एनआइसी एशिया बैंक खुद नाफामा पनि ऐतिहासिक छलाङ मारेको छ ।
बैंकले शुक्रबार सार्वजनिक गरेको आर्थिक वर्ष २०७५/७६ को चौथो त्रैमासिक विवरण अनुसार खुद नाफामा १२९.३२% ले वृद्धि गरेको छ । बैंकले गत आर्थिक वर्षमा ३ अर्ब ५ करोड रुपैयाँ खुद नाफा आर्जन गरेको छ।
यो अघिल्लो वर्षको तुलनामा १ अर्ब ७२ करोडले बढी हो । बैंकले अछिल्लो आर्थिक वर्षमा १ अर्ब ३३ करोड खुद नाफा कमाएको थियो ।
बैंकको वितरण योग्य नाफा २ अर्ब १५ करोड रुपैयाँ रहेको छ । बैंकले कुल आम्दानी ७७ प्रतिशतले बढाएर ९ अर्ब ५१ करोड आर्जन गरेको छ। यस अवधिमा खुद ब्याज आय ६५ प्रतिशत अर्थात् २ अर्ब ७५ करोडले वृद्धि गरी ६ अर्ब ६९ करोड पुर्याएको छ। सञ्चालन मुनाफा पनि १३९% अर्थात् २ अर्ब ६६ करोडले वृद्धि गरी ४ अर्ब ५८ करोड पुगेको छ ।
बैंकले निक्षेप संकलन २९ अर्ब ३६ करोडले बढाएर १ खर्ब ८० अर्ब ५८ करोड पुर्याएको छ भने कर्जा परिचालन २९ अर्ब ५४ करोडले बढाएर १ खर्ब ५० अर्ब पुर्याएको छ ।
बैंकको जगेडा कोषमा ३ अर्ब ८८ करोड रुपैयाँ रहेको छ । बैंकले प्रतिसेयर आम्दानी १७.९४ रुपैयाँले बढाएर ३४.५६ रुपैयाँ पुर्याएको छ । बैंकको प्रतिसेयर नेटवर्थ १६१ रुपैयाँ रहेको छ ।
