काठमाडौं । निषेधाज्ञा अवधिभर ग्यास अभाव नहुने बताइएको छ । ग्यास उद्योगीहरु डिपोमा भरीपूर्ण ग्यास रहेकाले अभाव नहुने बताउँछन् ।
तर, ग्यास उद्योग संघले खाली सिलिण्डर नराख्न आह्वान गरेसँगै उपभोक्तालले घरघरमा ग्यास सिलिन्डर थुपार्न थालेका छन् । पछिल्लो केही दिन यता सिलिन्डर विक्रेता पसलहरु एकै दिनमा पसल रितिन थालेको बताउन थालेका छन् । प्रान्जली ग्यास सप्लायर्सकी विक्रेता सुमना पन्थीका अनुसार एउटै उपभोक्ताले १५ वटा सम्म ग्यास स्टकमा लगेका छन् ।
उनले ग्यास झरेको एकै दिनमा पसल खाली भएको बताइन् । ‘ग्यास आएकै दिन सबै विकेको छ, एउटैले १५ वटा लग्छन् नलग भन्न मिलेन,’ पन्थीले चाणक्य पोष्टसँग भनिन् ।
निगमले सबै उद्योगलाई माग अनुसार ग्यास भरेर राख्नु भनेर परिपत्र गरेको थियो । त्यसै अनुसार उपभोक्तालाई केही समयलाई आवश्यक ग्यास जोहो गर्न भनिएको थियो ।उद्योगको प्लान्ट भरिभराउ रहेको र सिलिण्डर समेत भरी अवस्थामा छ । नेपाल ग्यासको हकमा काठमाडौंमा मात्रै १ हजार टन स्टोरेज छ ।
यस्तै ग्यास विक्रेता महासंघ नेपालका अध्यक्ष ज्ञानेश्वर अर्यालले निषेधाज्ञ हुने डरमा ग्यास भण्डारण गर्न थालेको बताए । उनले लकडाउन भए पनि ग्यास सप्लाई भइरहने बताए ।‘ग्यास अभाव हुन्न खाली भएका ग्यासका सिलिन्डर भरेर राख्न भनिएको हो, ६ महिना १ वर्षका लागि थुपार्नु भनेका हैनौँ,’ अर्यालले भने ।
आयल निगमले ग्यास आयात पर्याप्त रहेकोले उपभोक्ता आतिनुपर्ने अवस्था नरहेको जनाएको छ । गत मार्चमा मात्रै भारतबाट ४७ हजार टन ग्यास आएको छ । यो अहिलेसम्मकै धेरै आयात हो ।
निषेधाज्ञा जारी भएकाले होटल र रेष्टुरेन्ट बन्द हुने भएकाले ग्यासको खपत पनि कम हुदा अभाव नहुने बताइएको छ । आयल निगमका प्रवक्ता विनितमणी उपाध्याय ग्यास अभाव कुनै अवस्थामा पनि नहुने दाबी गर्छन् । उनले हल्लामा लाग्नुपर्ने अवस्था नरहेको बताए ।
भारतको कुनै पेट्रोलियम प्लान्ट बन्द नरहेकाले ग्यास अभाव हुने डर मान्नु नपर्ने बताए । उपभोक्ता डराउनु पर्दैन, ग्यास अभाव हुने कुनै चान्स नै छैन, भारतको कुनै पेट्रोलियम प्लान्ट बन्द भएको छैन,’ उपाध्यायले भने ।
उनले पछिल्लो समयको खपतले विगतमा भरिएर बसेका सबै ग्यास विक्री भइरहेको बताए । यो उद्योगीका लागि लट्रि जस्तै भएको उनले बताए ।
विगतमा शुरु भएको कोभिडका कारण ग्यासको खपत कम नै छ । यस अघि कोभिड संक्रमणको दर बढ्दै गएपछि लकडाउन पनि हुनसक्ने भएकाले उपभोक्तालाई आवश्यक मात्रामा ग्यास जोहो गर्न आग्रह गरिएको थियो
