काठमाडौं । नेपालमा बनेको इलेक्ट्रीक मोटरसाइकलको टेष्ट ड्राइभ शुरू भएको छ । युवा इन्जिनीयरहरूको टिमले निर्माण गरेको मोटरसाइकलको टेष्ट ड्राइभ कार्यक्रम होटल हायातमा आयोजना भएको हो ।
‘यात्री’ नाम दिइएको उक्त मोटरसाइकल गत वर्ष पहिलोपटक सार्वजनिक गरिएको थियो । यो मोटरसाइकलको पहिलो ५० युनिटको लिमिटेड एडिशनको (पी जेरो) निर्माण प्रक्रिया अन्तिम चरणमा रहेको छ । केही समय पश्चात् उक्त लिमिटेड एडिशन मोटरसाइकल बुकिङ गर्ने ग्राहकलाई हस्तान्तरण गर्नेछ भने पी १ लाई रेगुलर मोडलको रूपमा उत्पादन गर्ने कम्पनीले जनाएको छ ।
कम्पनीले नयाँ मोडल पी १ को टेष्ट ड्राइभ मार्फत प्रतिक्रिया लिइरहेको छ । कम्पनीले आफ्नो वेबसाइट मार्फत टेष्ट ड्राइभ गर्न चाहानेहरूको फारम लिएको थियो ।
यात्रीको नयाँ मोटरसाइकल पी १ मा रहेको मोटरले १९ हर्सपावर तथा ९० एनएम टर्क जेनेरेट गर्छ । यसको टप स्पीड १०० किलोमिटर प्रतिघण्टा रहेको छ । यो नमूना मोडलको पावर फिगर उत्पादनमा जाँदा तलमाथि हुन सक्ने कम्पनीले जनाएको छ । यो मोटरसाइकल निर्माणको नेतृत्व युवा इन्जिनियर असिम पाण्डेले गरिरहेका छन् ।
‘आफू अथक यात्री भएकाले नै होला आफ्नो उत्पादनमा पनि आफ्नै छायाँ देखें र पहिलो पटक नेपालीले नै डिजाइन गरेको र नेपालमै जडान गरिएको पूर्ण रूपमा नेपाली ब्राण्डको रूपमा रहेको इलेल्ट्रीक मोटरसाइकलको नाम पनि ‘यात्री’ नै राखें,’ पाण्डे भन्छन् ।
असिमको सवारी साधनहरूसँग सानैदेखि आकर्षण बढेको रहेछ । उमेर बढ्दै जाँदा त्यो आकर्षण ‘जुनुन’मा परिर्वतन भयो । अनि अहिले पेशा र सपना पनि ।
‘सानै देखि मोटरसाइकल र गाडीसँग धेरै लगाव थियो । त्यसैले पछि कुनै डिजाइन हाउसमा काम गर्छु भन्ने सोच भने थियो’ असिम भन्छन्, ‘म त ६–७ कक्षामा पढ्दा नै गाडी र मोटरसाइकल दुवै चलाउँथे’, उनले सुनाए ।
आफ्नो जुनुन पछ्याउँदै यूरोपमा हुने एकदमै ठूलो प्रतिस्पर्धा फर्मुला वानमा प्रतिस्पर्धा गरे उनले । त्यहाँ विद्यार्थीहरूले एक वर्षसम्म लगाएर तयार गरेको आफ्नो डिजाइनलाई प्रतिस्पर्धामा उतार्ने गर्छन् । त्यसमा करिब २ वर्ष बसेर उनले आफ्नो क्षमता बढाउने अवसर पाए ।
उनका अनुसार डेल्थ यूनिर्भसिटी उक्त प्रतिस्पर्धामा उत्कृष्ट बन्न सफल भएको थियो । त्यसरी त्यहाँ २ वर्ष काम गरेपछि डिजाइन, प्रडक्ट र रेस सबै कुराको जानकारी भएको र धेरै कुरा सिकेको उनी बताउँछन् । त्यसपछि मास्टर्स पढ्दा नेदरल्यान्डको डंकोहुट कम्पनीमा काम गरे, जसले ‘हाइपर कार’हरू बनाउने गर्छ ।
अहिले असिमसँग युवा इन्जिनियरहरूको टिम छ । साथीहरू प्रतिभावान र सज्जन भएको उनको अनुभव छ । उनीहरूको टिममा नेपालमै पढेका युवाहरू पनि छन् । उनीहरू सोचेभन्दा बढि नै क्षमतावान् भएको उनको अनुभव छ ।
उनीहरूलाई लाग्छ उनीहरूको उत्पादन नेपाली बजारमा मात्र होइन विश्व बजारमा नै एउटा ‘बेन्चमार्क’ कायम गर्ने किसिमको छ । ‘नेपालमा सामान्यत काम चल्छ भन्ने सोचाईबाट उत्पादनहरू बनाउने र ल्याउने चलनको साटो उत्कृष्ट उत्पादन बनाउने र कुनै किसिमको सम्झौता नगरी हामी यो मोटरसाइकल उत्पादन गर्दैछौं । यसले बजारमा ४०० सीसी सेग्मेन्टका मोटरसाइकलसँग प्रतिस्पर्धा गर्नेछ’ असिम भन्छन् ।
