काठमाडौं । पछिल्लो समय मदिराजन्य पदार्थको आयात घट्दै गइरहेको छ । सरकारले मदिराजन्य वस्तुमा कर बढाएसँगै आयात घटे पनि आन्तरिक उत्पादन र बढेको करका कारण राजस्व संकलन भने उच्च हुन गएको हो ।
आन्तरिक राजस्व विभागले चालु आर्थिक वर्षको फागुन मसान्तसम्ममा मदिराजन्य पदार्थबाट १५ अर्ब १३ करोड ३७ लाख रुपैयाँ राजस्व संकलन गरेको छ ।
आर्थिक वर्ष २०७६/७७ को सोही अवधिसम्म १४ अर्ब ७२ करोड ४९ लाख रुपैयाँ राजस्व संकलन भएको थियो । त्यस अघिको आर्थिक वर्ष २०७५/७६ को फागुन मसान्तसम्ममा १४ अर्ब ६१ करोड ५४ लाख रुपैयाँ राजस्व संकलन भएको राजस्व विभागका प्रवक्ता अर्जुन ढकालले जानकारी दिए ।
आर्थिक वर्ष २०७६/७७ मा कुल २० अर्ब ५ करोड रुपैयाँ बराबरको राजस्व मादिराजन्य पदार्थबाट संकलन भएको थियो । आर्थिक वर्ष २०७५÷७६ मा कुल २५ अर्ब २१ करोड रुपैयाँ राजस्व संकलन भएको थियो भने आर्थिक वर्ष २०७४/७५ मा कुल २२ अर्ब ९७ करोड रुपैयाँ बराबरको राजस्व संकलन भएको विभागले जनाएको छ ।
मदिराजन्य पदार्थको आयात घट्यो, यस्तो छ भन्सार राजश्वको अवस्था
चालु आर्थिक वर्षको फागुन महिनासम्ममा कुल १ अर्ब ४० करोड ९७ लाख रुपैयाँ बराबरको मदिराजन्य पदार्थ आयात भएको छ । सो आयातका क्रममा १ अर्ब ९६ करोड ५६ लाख रुपैयाँ भन्सार राजस्व संकलन भएको छ ।
गत आर्थिक वर्षको सोही अवधिमा २ अर्ब २६ करोड ७० लाख रुपैयाँ बराबरको मदिराजन्य पदार्थ आयात भएको थियो । उक्त आयातका क्रममा ३ अर्ब ३२ करोड १४ लाख रुपैयाँ भन्सार राजस्व संकलन भएको थियो ।
करको अवस्था
सरकारले १२ प्रतिशत अल्कोहल भएका वाइनहरुको पैठारीमा प्रतिलिटर ३७० रुपैयाँ अन्तः शुल्क लाग्ने व्यवस्था गरेको छ ।
१७ प्रतिशतभन्दा बढी अल्कोहल भएका वाइनको पैठारीमा ४३० रुपैयाँ कर वृद्धि भएको छ । अल्कोहल रहित वियरको मूल्यमा प्रतिलिटर १७ रुपैयाँ अन्तःशुल्क करको भार थपिएको छ । इनर्जी ड्रिक्समा प्रतिलिटर ३० रुपैयाँ, जौबाट बनेको वियरमा प्रतिलिटर १६५ रुपैयाँ कर थपिएको छ ।
स्वदेशमा उत्पादित फलफूल र तीनको सारबाट बनेका १२ प्रतिशतसम्म अल्कोहल भएका स्वदेशी वाइनमा प्रतिलिटर १३५ रुपैयाँ कर थपिएको छ । छ्याङ (कन्ट्री वियर) को प्रतिलिटरमा ३५ रुपैयाँ मूल्य बढाइएको छ ।
चालु आर्थिक वर्षको ८ महिना (साउन–फागुन) मा वियरबाट १२ अर्ब ५९ करोड रुपैयाँ राजस्व संकलन भएको थियो । गत आव २०७६/७७ को सोही अवधिमा १२ अर्ब ७२ करोड रुपैयाँ बराबरको वियर आयात भएको थियो । आर्थिक वर्ष २०७५/७६ को ८ महिनामा १२ अर्ब ८२ करोड रुपैयाँ वियरबाट राजस्व संकलन भएको थियो ।
गत आर्थिक वर्षमा वियरबाट कुल राजस्व १४ अर्ब ८१ करोड रुपैयाँ संकलन भएको थियो । आर्थिक वर्ष २०७५/७६ मा वियरबाट कुल राजस्व २० अर्ब ८८ करोड रुपैयाँ संकलन भएको थियो ।
