काठमाडौं । लक्ष्मी समूहले खेलकुद मार्फत आफ्नो शहर पोखरा लाई चिनाउने र प्रवर्धन गर्ने प्रतिबद्धताका साथ नेपाल सुपर लिगमा पोखरा थन्डर्स (फ्रेंचाइजी) लाई प्रवेश गरेको छ ।
यो समूहले पोखरा थन्डर्स नामको क्लबको मताधिकार (फ्रेंचाइजी) लिएर नयाँ खोज र अध्ययन गर्दै फूटबलको विकास र प्रवर्धनका लागि पोखरा शहर लगायत देशव्यपी रूपमा गर्ने लक्ष्य लिएको छ ।
नेपाल सुपर लिग देशको पहिलो फ्रेंचाइजी फुटबल प्रतियोगिता हो जुन अप्रिल २४ देखि मे ८ सम्म आयोजित हुने भएको छ । यो प्रतियोगिता एन्फाको प्राविधिक सहयोगमा दशरथ स्टेडियममा राउन्ड रोबिन ढाँचामा खेलिने छ ।
अहिले नेपाली जीवन शैलीको अभिन्न अङ्ग बनेको लक्ष्मी समूह आफ्नो शुरुवात देखि विभिन्न उद्योग र व्यापारहरुमा अब्बल रहँदै आएको छ । आधा शताब्दीको लामो यात्राका साथ अहिले यस समूह अन्तर्गत २० वटा विभिन्न व्यवसायिक क्षेत्रका उद्योग जसमा निर्माण, कृषि आधारित डेरी उद्योग, व्यापार, अस्पताल रहेको छ र अब पोखरा थन्डर्स मार्फत खेलकुद क्षेत्रमा प्रवेश गरेको छ । खेल्कुदको विकास र प्रर्वधनमा लक्ष्मी समूहको लामो इतिहास रहिआएको छ ।
सुपर लिगमा लिलामी प्रकियाद्धारा पोखराले मुख्य प्रशिक्षकमा नवीन न्यौपाने लिएको छ । थन्डर्सले नवयुग श्रेष्ठ, अनिल गुरुङ, सुजल श्रेष्ठ, नितिन थापा, दीपक गुरुङ लयायत ३ विदेशी खेलाडीसहितको टीम बनाएको छ ।
नयाँ विचार र अवसरहरू खोजी गर्ने क्रममा लक्ष्मी ग्रुपले पोखरा थन्डर्स मताधिकारबाट (फ्रेंचाइजी) नयाँ सफलताका कोसेढुङ्गाहरु पार गर्दै नेपाली फुटबलको विकासमा टेवा दिने आशा गरेको छ । पोखरा थन्डर्सको लक्ष्य उत्कृष्ट टिमको निर्माण गर्नु हो जहाँ खेल भावना नै टिमको सफलता हुनेछ । जसले नेपाली फुटबललाई अझ व्यवसायिक बनाउने काममा ठूलो योगदान प्रदान गर्नेछ ।
