काठमाडौं । निषेधाज्ञाकै बीच वाणिज्य बैंकहरूले कर्जा लगानी विस्तार गरेको छन् । भदौ महिनाको तीन सातामा वाणिज्य बैंकहरुले १९ अर्ब कर्जा लगानी गरेका छन् भने १२ अर्ब निक्षेप संकलन गरेको छन् ।
कोरोना भाइरसको नियन्त्रणका लागि सरकारले भदौ ३ गतेदेखि निषेधाज्ञा लगाए पनि यस अवधिमा उक्त कर्जा लगानी गरेका हुन् ।
२७ वाणिज्यहरूले भदौको पहिलो साता ८ अर्ब रुपैयाँ , दोस्रो साता ६ अर्ब र तेस्रो साता ५ अर्ब रुपैयाँ कर्जा प्रभाह गरेका छन् । निषेधाज्ञाका कारण उद्योग, कलकारखाना लगायत आर्थिक गतिविधि ठप्प भए पनि बैंकहरुले कर्जा विस्तार गर्न सफल भएका हुन् ।
साउन मसान्तसम्म बैंकहरुले २८ खर्ब ७८ अर्ब रुपैयाँ कर्जा प्रवाह गरेका थिए । उक्त अवधिसम्म बैंकहरुमा ३४ खर्ब ७९ अर्ब निक्षेप रहेको थियो ।
भदौ १९ गतेसम्म बैंकहरुको कर्जा प्रवाह १९ अर्ब रुपैयाँले बढेर २८ खर्ब ९७ अर्ब रुपैयाँ पुगेको छ भने निक्षेप ३४ खर्ब ९१ अर्ब रहेको छ । भदौको १९ गतेसम्म १२ अर्ब रुपैयाँले बढाएर ३४ खर्ब ९१ अर्ब रुपैयाँ निक्षेप संकलन गरेका हुन् ।
