गर–गहना देखि नुनसम्मको व्यापार गर्ने १११ अर्ब डलरको व्यवसायिक साम्राज्य भएको भारतको टाटा ग्रुप पनि डिजिटल व्यवसायमा प्रवेश गर्ने भएको छ ।
कम्पनी अहिले ‘अल इन वान’ इ–कर्मश एपको निर्माणमा जुटेको छ । सो एप मार्फत कम्पनीले कम्पनीले आफ्ना उपभोक्ता लक्षित उत्पादन र सेवाहरु बिक्री गर्नेछ । उक्त एप सन् २०२० को अन्त्यसम्म वा सन् २०२१ को शुरुवाती समयमा सार्वजनिक गर्ने तयारीमा कम्पनी जुटेको जनाइएको छ ।
भारतको आर्थिक राजधानीको रुपमा चिनिने मुम्बई स्थित यो कम्पनी अनलाइनमा आफ्नो जबर्जस्त उपस्थितिका लागि अगाडि बढिरहेको छ । सिस्को सिस्टम्स इन्कले गरेको एक अध्ययनका अनुसार सन् २०२३ सम्म भारतीय बजारमा इन्टरनेट प्रयोगकर्ताको संख्या झण्डै १ अर्ब पुग्नेछ र प्रायः सबैसँग स्मार्टफोन हुनेछ । र, अध्ययनका अनुसार स्मार्टफोनको प्रयोग इन्टरनेटमा रहेका सामग्री हेर्न, किनमेल गर्न र पैसा तिरोतारो गर्नका लागि प्रयोग हुने छ ।
टाटा आफ्ना प्रतिस्पर्धीहरु अमेजोन, वालमार्टको फिल्पकार्ट र अर्का भारतीय अर्बपति मुकेश अम्बानीको रिलायन्स इन्डसट्रिजसँगको प्रतिस्पर्धामा खरो उत्रन खाजेको देखिएको छ । रिलायन्सले हालै फेसबुक र गुगल समेतको लगानी गरेर करिब २० अर्ब डलरभन्दा बढी लगानी उठाइसकेको छ । यसैगरी विश्वको दोस्रो धेरै जनसंख्या भएको देश भारतमा विश्वका सबैभन्दा धनी व्यक्ति एवं अमेजोनका मालिक जेफ बेजोसले पनि ६.५ अर्ब डलरको लगानी घोषणा गरिसकेका छन् ।
टाटाको डिजीटल प्रमुख प्रतिक पालले यो एप निर्माणको नेतृत्व गरिरहेका छन् । उनको टाटा कन्सल्टेन्सीमा रिटेल हेडको रुपमा ३ दशक लामो अनुभव छ । उनले त्यस भुमिका मार्फत वालमार्ट, टेस्को, अल्डीजस्ता विश्वका ठूला रिटेल खेलाडीहरुको डिजीटल रुपान्तरणमा सघाएका छन् ।
यो ‘अल इन वान’ एपले गाडी, एयर कन्डिशनर, स्मार्ट घडिदेखि लिएर चियासम्म उत्पादन गर्ने टाटा ग्रुपको पहुँच र दायरा अझ सघन र गहिरो बनाउने लक्ष्य लिएको बताइएको छ । टाटा ग्रुपले विलासी होटल, एयसलाइन्स, बिमा, डिपार्टमेन्ट स्टोर र सुपरमार्केट चेनको पनि सञ्चालन गरिरहेको छ । साथै बिलासी ब्राण्डहरु टेट्ली, ज्यागुअर, ल्याण्ड रोभर र भारतको स्टार बक्स पनि यो ग्रुपकै स्वामित्वमा रहेको छ ।
होल्डीङ कम्पनी टाटा सन्स प्रालीका अध्यक्ष नटराजन चन्द्रशेखरन अहिले डिजीटाइजेशन ‘क्याम्पेन’को नेतृत्व गरिरहेका छन् ।
