काठमाडौं । डिश मिडिया नेटवर्क लिमिटेडले सर्वसाधारणलाई आइपीओ जारी गर्ने प्रकृयालाई अन्तिम चरणमा पुर्याएको छ । कम्पनीले डिशहोमको सेयर सर्वसाधारणलाई विक्री गर्न लागेको हो ।
यसरी नागरिकलाई सेयर वितरण गर्न लागेको कम्पनीले सिम्पल मिडिया नेटवर्कको नामबाट सिम टिभी र डिशहोम फाइबर इन्टरनेटसमेत संचालन गरिरहेको छ ।
डिशहोम नेपालमा टेलिभिजन हेर्ने संस्कृतिमा नै परिवर्तन ल्याउने उत्पादनको रुपमा रहेको छ । नेपालमा ‘एनालग’ माध्यमबाट टेलिभिजन प्रशारण भइरहेकोमा डिशहोमले तार बिनै नेपालको कुना कन्दरामा टेलिभिजन हेर्न सक्ने बनाएर धेरै नेपालीको मन जित्न सफल भइरहेको छ ।
‘अहिले २५ एमबीपीएस इन्टरनेट अन्य कम्पनीले दिँदा १५ सय रुपैयाँभन्दा बढी लिइरहेका छन् । तर हामीले मासिक ११ सयमा इन्टरनेट र २५० रुपैयाँ थप गरेर टेलिभिजन सेवा दिइरहेका छौं ।’
‘विगतदेखि नै हाम्रो प्रयत्न ग्राहकलाई उत्कृष्ट सेवा दिने हो । यही लक्ष्यमा केन्द्रित रहेर हामी नेपालको प्रत्येक वडामा हाम्रो सेवा पुर्याउन सफल भएका छौं । अहिले नागरिकसँगको सम्बन्ध अझै बलियो बनाउन साधारण सेयर निस्काशन गर्ने अन्तिम तयारीमा छौं’, कम्पनीका महाप्रबन्धक रमेश सापकोटाले भने ।
अहिले कम्पनीले सेयर निष्काशनका लागि धितोपत्र बोर्डसँग अनुमति माग गरेको छ । यस्तोमा डिश मिडिया नेटवर्कले कहाँ कहाँ लगानी गर्दै आफ्नो सेवा विस्तार गर्दै आएको छ भन्ने धेरैको चासो रहेको पाइन्छ ।
डिशहोम फाइबर नेट र सिम टिभी
विगत दुई वर्षदेखि सिम्पल मिडिया नेटवर्कले संचालन गर्दै आएको सिम टिभी र केही महिना अघि मात्रै संचालनमा आएको डिशहोम फाइबर नेट छुट्टै कम्पनीको रुपमा संचालन भएको भएपनि यी दुबै ‘प्रडक्ट’ डिशहोम अन्तर्गत संचालन भइरहेको छ ।
अहिले फरक कम्पनी भएको भए पनि यी सबै कम्पनी क्रमिक रुपमा डिश मिडिया नेटवर्कमा नै मर्जर गर्दै लाने कम्पनीले जनाएको छ । एउटै प्रमोटर भएका कारण पछि मर्ज गरेर जान सहज हुने कम्पनीको भनाइ छ ।
‘पब्लिक कम्पनीको रुपमा अगाडि बढेपछि तुलनात्मक रुपमा पारदर्शि बनाउँदै लगेर मर्ज गर्ने हाम्रो लक्ष्य हो’ महाप्रबन्ध सापकोटाले चाणक्य पोष्टसँग भने ।
सिम टिभी विगतमा संचालनमा रहेको स्पेश टाइम नेपालको ग्राहकको बीचमा निकै चर्चामा रहेको छ । उपत्यकामा हिजो एनालग हुँदा जस-जसले स्पेश टाइम नेटवर्क प्रयोग गरिरहनु भएको थियो, त्यहाँ अहिले सिम टिभी वितरण गरिरहेका छौं । केबलहरु मध्ये ‘हाइडेफिनेशन’ क्वालिटीको सेटअप बक्स वितरण गर्ने सिम टिभी पहिलो कम्पनी रहेको सापकोटा बताउँछन् ।
उनका अनुसार काठमाडौंमा अहिले सिम टिभीको ग्राहक बढ्दो क्रममा रहेको छ । विगत केही महिनादेखि उपत्यकामा फाइबर इन्टरनेट वितरण सुरु गरेको कम्पनीले १ हजार ग्राहक संख्या पुर्याएको छ ।
‘हामी आक्रामक ग्राहक विस्तारका साथ काम गर्न चाहन्थ्यौं । तर लकडाउन र कोरोना संक्रमणको कारण सोचे जस्तो विस्तार हुन सकेको छैन । यद्यपी हामीले १ हजार ग्राहक संख्या पुर्याइसकेका छौं’, सापकोटाले भने ।
उनका अनुसार कम्पनीले डिशहोमसँग इन्टरनेट र सिम टिभीसँग इन्टरनेटको ‘कम्बो प्याक’ नै बनाएर तीव्र इन्टरनेट विस्तारमा काम सुरु गरेको छ । सापकोटा भन्छन्, ‘हाम्रो उद्देश्य ग्राहकलाई स्तरीय सेवा दिँदै आफ्नो व्यवसाय विस्तार गर्ने हो । बजारमा अहिले अन्यले दिने सेवाभन्दा हाम्रो सेवा सस्तो रहेको छ ।’
कम्पनीको सेवा सर्व–सुलभ रहेको दाबी गर्दै सापकोटा भन्छन्, ‘अहिले २५ एमबीपीएस इन्टरनेट अन्य कम्पनीले दिँदा १५ सय रुपैयाँभन्दा बढी लिइरहेका छन् । तर हामीले मासिक ११ सयमा इन्टरनेट र २५० रुपैयाँ थप गरेर टेलिभिजन सेवा दिइरहेका छौं ।’
कहाँ कहाँ छ इन्टरनेट सुविधा
उपत्यकामा भैँसेपाटी, बुङमति, कपन, बौद्ध, तिनकुने र बानेश्वर एरियामा फाइवर इन्टरनेट सेवा उपलब्ध रहेको छ । भैसेपाटी, बुङमती, कपन र बौद्ध एरियामा डिशहोम र इन्टरनेटको कम्बो प्याकेज विक्री भइरहेको छ भने तिनकुने र बानेश्वर एरियामा सिम टिभीसँग कम्बो प्याकेज ग्राहकले किन्न सक्ने छन् ।
