काठमाडौं । सरकारी स्वामित्वको नेपाल बैंकको नाफामा सामान्य गिरावट आएको छ ।बैंकले आइतबार सार्वजनिक गरेको गत आवको चौथो त्रैमासिक त्रैमासिक वित्तीय विवरण अनुसार बैंकको खुद नाफा ४ करोड ६७ लाखले घटेको छ ।
बैंकले गत आवको असारसम्ममा २ अर्ब ५५ करोड रुपैयाँ खुद नाफा कमाएको छ। अघिल्लो आवमा बैंकले २ अर्ब ५९ करोड ६७ लाख खुद नाफा कमाएको थियो ।
कोरोनाका कारण कर्जा असुली तथा लगानीमा कमी आउँदा नाफा घटेको बैंकले जनाएको छ । बैंकले समीक्षा अवधिसम्ममा ५ अर्ब ६१ करोड ८९ लाख रुपैयाँ खुद नाफा आर्जन गरेको छ। यो अघिल्लो आर्थिक वर्षको सोही अवधिको तुलनामा ५७ करोड ५ लाख रुपैयाँ कम हो।
समीक्षा अवधिमा बैंकको सञ्चालन मुनाफा ९४ करोड ३६ लाख रुपैयाँ घटेर ३ अर्ब ५६ करोड ६४ लाख रुपैयाँमा सीमित भएको छ।
सो अवधिसम्ममा बैंकको वितरण योग्य मुनाफा २ अर्ब २१ करोड ४ लाख रुपैयाँ रहेको छ । हाल ११ अर्ब २८ करोड २८ लाख रुपैयाँ चुक्ता पूँजी रहेको बैंकको जगेडा कोषमा १२ अर्ब ९८ करोड ५४ लाख रुपैयाँ छ । बैंकको सेयरधनी कोषमा ४ अर्ब १२ करोड ५० लाख रुपैयाँ र सेयर प्रिमियममा १ अर्ब ७८ करोड ८७ लाख रुपैयाँ सञ्चित छ।
गत असार मसान्तसम्ममा बैंकले १ खर्ब ४२ अर्ब निक्षेप संकलन गरी १ खर्ब ४ अर्ब कर्जा लगानी गरेको छ।
खुद नाफा घटेसँगै बैंकको प्रतिसेयर आम्दानीमा पनि गिरावट आएको छ। अघिल्लो आवमा २६.९९ रुपैयाँ रहेको बैंक प्रतिसेयर आम्दानी ४.३३ रुपैयाँले घटेर २२.६६ रुपैयाँमा कायम भएको छ । बैंकको प्रतिसेयर नेटवर्थ २६७.५० रुपैयाँ, मूल्य आम्दानी अनुपात १०.९९ गुणा छ ।
