काठमाडौं । अब नेपाल टेलिकमको पोस्टपेड सिमकार्ड प्रयोगकर्ताले हरेक रिचार्जमा २ प्रतिशत कर तिर्नुपर्ने भएको छ ।
यसअघि सिमकार्ड दिँदा नै एकमुष्ट स्वामित कर लिने गरेको टेलिकमले अब भने हरेक रिचार्जमा २ प्रतिशत स्वामित कर लिने भएको हो ।
नेपाल टेलिकमका सूचना अधिकारी शोभन अधिकारीका अनुसार यसअघि नयाँ सिमकार्ड दिँदा नै एकमुष्ट स्वामित्व कर लिने गरिएको थियो । अहिले सिमकार्ड किन्दा कर नलिने भएकाले रिचार्जमा कर लगाइएको हो ।
‘यसअघि नयाँ पोस्टपेड सिमकार्ड दिँदा ५०० स्वामित्व करसहित ११३० रुपैयाँ लिने गरिएको थियो,’ उनले भने, ‘अहिले स्वामित्व कर नलिइ ५०० रुपैयाँमै सिमकार्ड दिइने गरिएको छ । त्यसैले अबदेखि रिचार्जमा २ प्रतिशत स्वामित्व कर लाग्ने भएको हो ।’
टेलिकमले प्रिपेड मोबाइलको रिचार्जमा भने यसअघि नै २ प्रतिशत स्वामित्व कर लगाउँदै आएको छ ।
