काठमाडौं । बैंक तथा वित्तीय संस्थामा नेपालीहरुको वित्तीय पहुँच क्रमशः बढ्दै गएको छ । बैशाख मसान्तसम्ममा तीन करोडभन्दा बढी नेपालीको बैंक तथा वित्तीय संस्थामा बचत खाता रहेको छ ।
नेपाल राष्ट्र बैंकले आज सार्वजनिक गरेको आर्थिक वर्ष २०७६/७७ काे माैद्रिक नीति अनुसार २०७६ बैशाख मसान्तमा वाणिज्य बैंक, विकास बैंक र वित्त कम्पनीहरुमा रहेको निक्षेप खाता संख्या २ करोड ७३ लाख पुगेको छ । साथै, लघुवित्त कम्पनीहरुमा ४१ लाख ५८ हजार खाता संख्या रहेको छ । यसरी बैंक तथा वित्तीय संस्था र लघुवित्तको खाता संख्या जोड्दा ३ करोड १४ लाख ५८ हजार बचत खाता संचालनमा रहेका छन् ।
यस्तै बैंक तथा वित्तीय संस्थाहरुमा १४ लाख ५४ हजार कर्जा खाता रहेका छन् भने लघुवित्तमा २६ लाख १३ हजार कर्जा खाता रहेकाे छन् । दुबैमा गरेर ४० लाख ७१ हजार कर्जा खाता रहेका छन् ।
यस्तै देशका ७ सय ५३ स्थानीय तहमध्ये ७ सय ३२ स्थानीय तहमा वाणिज्य बैंकका शाखा पुगेका छन् । अब ३१ स्थानीय तहमा मात्रै वाणिज्य बैंकका शाखा पुग्न बाँकी छ ।
वित्तीय संस्थाको शाखा संख्या साढे ८ हजार पुग्यो
२०७६ जेठ मसान्तसम्ममा बैंक तथा वित्तीय संस्थाको शाखा संख्या ८ हजार ५६४ पुगेको छ । जसमा वाणिज्य बैंकहरुको ३ हजार ५३९, विकास बैंकको १ हजार २५०, वित्त कम्पनीहरुको २०५ र लघुवित्त वित्तीय संस्थाहरुको ३ हजार ५७० शाखा रहेका छन् ।
२०७५ जेठ मसान्तमा भने बैंक तथा वित्तीय संस्थाको शाखा संख्या ६ हजार ४१४ रहेको थियो । त्यस्तै बैंक तथा वित्तीय संस्थाको एक शाखाबाट औसतमा ३४११ जनसंख्याले सेवा लिनसक्ने अवस्था रहेको छ ।
यस्तै मोबाइल बैकिङ्ग प्रयोगकर्ता ७० लाख पुगेका छन् भने, इन्टरनेट बैकिङ्गका ग्राहकको संख्या ८ लाख ९३ हजार पुगेका छन् । बैंक तथा वित्तीय संस्थाहरुले ग्राहकलाई जारी गरेका डेबिट कार्डको संख्या ६२ लाख ८१ हजार तथा क्रेडिट कार्डको संख्या १ लाख १३ हजार पुगेको छ ।
