संयुक्त राज्य अमेरिकाले आगामी ३ महिनासम्मका लागि विश्वभर उत्पादन हुने भाइरस प्रतिरोधात्मक औषधि ‘रेम्डेसेभिर’ सबै खरिद गरेको छ । यो औषधि कोरोना भाइरस विरुद्ध प्रभावकारी हुने देखिएको छ ।
अमेरिकाको स्वास्थ्य सेवा विभागले सोमबार ५ लाख उपचार ‘कोर्स’ भन्दा बढी ‘रेम्डेसेभिर’ खरिद गर्ने डिल गरेको जनाएको छ । यो भनेको औषधी निर्माता कम्पनी ‘गिलिड साइन्सेस’ले आगामी जुलाइ महिनामा उत्पादन गर्ने सम्पूर्ण औषधि र आगामी सेप्टेम्बरसम्म उत्पादन हुने कुल औषधिको ९० प्रतिशत हो ।
‘रेम्डेसेभिर’ कारोना विरुद्ध प्रभावकारी देखिएको पहिलो औषधि हो । र, विश्वभरी यो औषधिको प्रभावकारीतालाई नजिकबाट नियाल्ने गरिएको छ ।
‘राष्ट्रपति ट्रम्पले अभूतपूर्व डिल गर्नुभएको छ । अमेरिकीहरुलाई कोरोना विरुद्धको पहिलो आधिकारिक औषधिको सहज पहुँच यो डिलले दिलाएको छ । हामी यो औषधि चाहने हरेक अमेरिकीहरु माझ यो औषधि पलब्ध होस भन्ने चाहन्छौं,’ स्वास्थ्य सेवा विभागका सचिव एलेक्स अजरले विज्ञप्तिमा भनेका छन् ।
‘रेम्डेसेभिर’ कारोना विरुद्ध प्रभावकारी देखिएको पहिलो औषधि हो । र, विश्वभरी यो औषधिको प्रभावकारीतालाई नजिकबाट नियाल्ने गरिएको छ ।
गत मे महिनामा अमेरिकी नियमनले यो औषधिको आपतकालीन प्रयोगको लागि स्वीकृति दिएको थियो । यो औषधिको प्रयोग पश्चात केही बिरामीहरु तीव्र गतिमा निको भएका थिए ।
जापानी स्वास्थ्य नियामकहरुले पनि यो औषधि प्रयोगको लागि छुट गरेका छन् । औषधिहरुको स्वीकृतिका लागि अमेरिकामा लामो समय लाग्छ । तर, अन्य विकल्प नभएको आपतकालीन अवस्थामा प्रयोगका लागि यो औषधिलाई खुल्ला गरिएको थियो ।
अहिले अमेरिकामा कोरोना भाइरस विरुद्ध सामान्य प्रयोगको लागि कुनैपनि औषधि वा भ्याक्सिनलाई खुल्ला गरिएको छैन । हाल यो भाइरसले अमेरिकामा १ लाख २७ हजार र विश्वव्यापी रुपमा ५ लाख मानिसहरुको ज्यान लिइसकेको छ ।
हाल विभिन्न कम्पनीहरु यो भाइरस विरुद्ध औषधिको अनुसन्धानमा लागेका छन् । ‘रेम्डेसेभिर’ पहिले इबोला भाइरस विरुद्धको प्रयोगमा अप्रभावकारी देखिएको औषधि हो । यो औषधि भाइरसहरुको प्रणालीलाई भत्काउनको लागि प्रयोग हुन्छ र प्रयोगकर्ताको रोग प्रतिरोधात्मक क्षमता वृद्धि गर्छ ।
सोमबार ‘रेम्डेसेभिर’ प्रयोगकर्ता कम्पनी गिलिडले यो औषधी प्रयोग गर्दा अमेरिका र अन्य धनी देशहरुमा प्रति बिरामी २३ सय ४० अमेरिकी डलर खर्च हुने जनाएको छ । गरिब देशहरुको लागि कम्पनीले अन्य औषधि निर्माताहरुलाई उत्पादनको अधिकार दिने निर्णय गर्ने भएको छ ।
गत महिना सस्तो र सहज उपलब्ध हुने ‘डेक्सामिथासोन’ औषधि पनि कोरोना विरुद्ध प्रभावकारी हुने प्रमाणित भएको थियो ।
-एजेन्सी
