काठमाडौं । एनएमबी बैंकले विश्व बैंक सदस्य समूह अन्तर्राष्ट्रिय वित्त निगम (आइएफसी) बाट २ करोड ५० लाख अमेरिकी डलर (करिब ३ अर्ब रुपैयाँ ऋण लिने भएको छ ।
बैंकले सो सम्बन्धी सम्झौतापत्रमा हस्ताक्षर गरेको छ । समझदारीपत्रमा एनएमबी बैंकका प्रमुख कार्यकारी अधिकृत सुनील केसी र आइएफसीका एक्टिङ रेजिडेन्ट रिप्रिजेन्टेटिभ सन्तोष पाण्डेले हस्ताक्षर गरेका छन् ।
यो समझदारीसँगै एनएमबी दुई वर्षको अवधिमा आइएफसीबाट लगातार दुईपटक कर्जा प्राप्त गर्ने नेपालको बैंक बनेको हो ।
आइएफसीबाट ल्याउने उक्त रकम कोरोनाका कारण समस्यामा परेका साना तथा मझौला उद्यमी वर्गका लागि आवश्यक कर्जाको आपूर्ति गर्नुका साथै र नयाँ उद्यमीलाई पनि प्रोत्साहित गर्ने बैंकको दाबी छ । साथै हरित परियोजनाहरूको सशक्तीकरणमा सघाउ पुर्याउन सदुपयोग गरिने बैंकले जनाएको छ ।
