काठमाडौं । विगत ३ महिनादेखि मूल्य समायोजन नगरेको निगमले पेट्रोल र डिजेलमा घाटा बढेको भन्दै मूल्य समायोजन गर्ने तयारी सुरु गरेको छ ।
भारतीय आयल कर्पोरेसनले पेट्रोल र डिजेलको मूल्यमा वृद्धिगरी नयाँ रेट पठाएपछि निगमले मूल्य समायोजन गर्ने तयारी थालेको हो ।
नयाँ मूल्य अनुसार निगमलाई प्रतिलिटर पेट्रोलमा ५ रुपैयाँका हाराहारीमा घाटा हुने भएको निगमका प्रवक्ता विनित उपाध्यायले जानकारी दिए । उनका अनुसार नयाँ मूल्यसूची अनुसार पेट्रोलको मूल्य समायोजन गर्नु पर्ने देखिएको हो ।
‘नयाँ दर अनुसार पेट्रोलको मूल्य बढेर आएको छ, त्यसले निगमलाई ५ रुपैयाँ चानचुन घाटा हुन्छ, त्यसैले मूल्य बढ्न सक्छ । तर, यस विषयमा निर्णय भइसकेको छैन,’ उपाध्यायले चाणक्य पोस्टसँग भने ।
सरकारले आगामी आर्थिक वर्ष २०७७/७८ को बजेट मार्फत प्रतिलिटर १० रुपैयाँ भन्सार लगाउँदा त्यसको प्रत्येक्ष असर मूल्यमा परेको हो ।
अन्तर्राष्ट्रिय बजारमा सर्वाधिक न्यून मूल्यमा कच्चा तेलको कारोवार भएको समयमा सरकारले पेट्रो, डिजेल र मट्टीतेलमा प्रतिलिटर १० रुपैयाँ कर लगाएको थियो ।
त्यतिबेला अहिलेको मूल्यमा नै पेट्रोलियम पदार्थ किन्न पाइने बताएको सरकारले अब भने मूल्य वृद्धि गर्ने तयारी गरेको हो ।
