काठमाडौं । सरकारले बोलकबोल प्रक्रियाबाट १० नयाँ खानीको सञ्चालन गर्न दिने तयारी गरेको छ ।
खानी तथा भूगर्भ विभागले बुधबार एक सूचना प्रकाशन गर्दै नुनदेखि सुनसम्मका खानीको उत्खनन तथा अनुसन्धानका लागि अनुमति दिइने जनाएको छ । विभागले तामा, चुनढुंगा, नुन, कोइला, ग्रेनाइट र केओलिन लगायतको उत्खनन-अध्ययन गर्न अनुमति दिने जनाएको छ ।
विभागले ३५ दिनभित्र खानीको उत्खनन-अध्ययन गर्न इच्छुक फर्म तथा कम्पनीहरूबाट आवेदनको माग गरेको छ।
विभागले रोल्पाको सुनछहारी गाउँपालिकामा सुनखानी सञ्चालनका लागि लाइसेन्स खोलिएको छ । त्यहाँको फुलिबन र धन्पुटार क्षेत्रमा सुनखानी रहेको बताइएको छ ।
विभागले लाइसेन्स खुला गरेका खानीमा सबैभन्दा बढी तामाका रहेका छन् । धादिङको बेनिघाट रोराङ गाउँपालिका, मकवानपुरको थाहा नगरपालिका र उदयपुरको कटारी नगरपालिकामा तामाको भण्डार रहेको छ ।
बेनिघाटको धुषा, थाहाको आग्रा र कटारीको लेखानीमा रहेको तामा उत्खननका लागि लाइसेन्स खुला गरिएको हो ।
त्यसैगरी, सल्यानको कपुरकोट गाउँपालिका र धादिङको बेनिघाट रोराङ गाउँपालिकामा चुनढुंगा खानीका लागि लाइसेन्स खोलिएको छ ।
मुस्ताङको बराहगाउँ मुक्तिक्षेत्र गाउँपालिकामा नुन खानीको लाइसेन्स खोलिएको छ । त्यहाँ ७० देखि ९४ प्रतिशतसम्म सोडियम क्लोराइड रहेको छ ।
मकवानपुरको थाहामा ग्रेनाइट र काओलिन र पाल्पाको निस्दी गाउँपालिकामा कोइला खानीका लागि पनि लाइसेन्स खोलिएको छ ।
चुनढुंगा, नुन र ग्रेनाइटका लागि खानीको लाइसेन्स दिन लागिएको हो भने बाँकीका लागि प्रोस्पेक्टिङ लाइसेन्स खोलिएको हो ।
