काठमाडौं । प्रहरीले लकडाउन कडाइ गर्ने भन्दै जबर्जस्ती पसल बन्द गराउँदै हिँडेपछि देशकै प्रमुख व्यापारिक केन्द्र न्यूरोड क्षेत्रमा प्रहरी र व्यापारी बीच विवाद भएको छ ।
न्यूरोड, असन,रञ्जना गल्ली लगायत क्षेत्रमा प्रहरीले पसल बन्द गराउँदै हिँडेपछि गरी खाना पाउनु पर्ने भन्दै व्यापारीहरु त्यसको विरोधमा समेत उत्रिएका छन् ।
सरकारले एकोहोरो लकडाउन मात्र गरिराखेको तर कुनै पनि विकल्प र राहत नदिएको भन्दै जेठ २२ देखि उपत्यकाका अधिकांश व्यापारीले पसल खोल्दै आएका थिए । तर, प्रहरी लकडाउनको मोडालिटी परिवर्तन नभएको भन्दै पसल बन्द गराएपछि व्यापारी र प्रहरीबीच भनाभन समेत भएको छ ।
‘माथिको आदेश भन्दै प्रहरीहरु जबर्जस्ती पसल बन्द गराउँदै हिँडेका छन्,’ असनका एक व्यापारीले भने, ‘सरकार लकडाउन मात्र गर्ने । हामीले हातमुख जोड्नका लागि काम गरेर समेत खाना नपाउने । अब सरकारले कुनै विकल्प दिनुपर्छ ।’
गत साता काठमाडौं, भक्तपुर र ललितपुरका सीडीओलगायत सरोकारवाला बीच भएको बैठकले पनि व्यापारीलाई पसल खोल्न अवरोध नगर्ने निर्णय गरेको थियो ।
तर, प्रहरीले भने जबर्जस्ती पसल बन्द गराउँदै हिँडेपछि कोरोना कहरले थिचिएका व्यापारी झन आक्रोशित भएका छन् । प्रहरीले भने सरकारले लकडाउनको मोडालिटी परिवर्तन नगरेकाले पहिलाको जस्तै सबैले लकडाउन पालना गर्नुपर्ने बताएको छ ।
