पेट्रोलियम निर्यातकर्ता देशहरुको संगठन (ओपेक) र संगठनबाहिर रुसलगायत प्रमुख उत्पादकहरुको समूह अर्थात् ओपेक प्लसले तेल कटौती थप एक महीना लम्ब्याउने सहमति गरेका छन् ।
तेलको उत्पादन कटौती जुलाईसम्म विस्तार गर्न ओपेकप्लस सहमत भएका हुन् । अप्रिलमा भने कोरोना भाइरसको महामारीका कारण चपेटामा आएको तेलको भाउलाई टेवा दिन समूहले मे र जुनका लागि उत्पादन ऐतिहासिक स्तरमा कटौती गर्न सहमति गरेका थिए ।
कोरोना भाइरसको संक्रमण फैलिन नदिन विश्वभर देशहरुले कठोर बन्दाबन्दी लगाएसँगै तेलको माग घटेर भाउ पनि प्रभावित भएको छ ।
अप्रिलमा भएको सहमति अनुसार ओपेकप्लसले उत्पादन मे १ देखि जुनको अन्त्यसम्म दैनिक ९७ लाख ब्यारेलले घटाउने भनिएको थियो । जुलाई देखि डिसेम्बरसम्म भने उत्पादन कटौती घटाएर दैनिक ७७ लाख ब्यारेलमा ल्याइने भएको थियो ।
तर समूहको शनिबार बसेको बैठकले भने ऐतिहासिक कटौती जुलाईसम्म पुर्याउने सहमति गरेका छन् ।
–एएफपी
