काठमाडौं । लकडाउनको पछिल्लो १ महिनामा विदेशी तथा स्वदेशीको लगानी रहने गरी उद्योगमा पौने ३ अर्ब रुपैयाँ लगानी भित्रिएको छ ।
उद्योग, वाणिज्य तथा आपूर्ति मन्त्रालयका अनुसार १ महिनाका अवधिमा स्वदेशी ४ र विदेशी ११ गरी १५ उद्योगमा २ अर्ब ७४ करोड ९० लाख रुपैयाँ बराबरको लगानी स्वीकृत भएको छ ।
उद्योग विभागबाट ११ उद्योगमा ९२ करोड ७० लाख रुपैयाँ विदेशी लगानी र चार नयाँ उद्योगमा १ अर्ब ८२ करोड २० लाख रुपैयाँ स्वदेशी लगानी भित्रिएको मन्त्रालयका प्रवक्ता प्रकाश दाहालले जानकारी दिए ।
उनका अनुसार सबैभन्दा धेरै लगानी चीनबाट भित्रिएको छ । चीनबाट सात उद्योगमा ७२ करोड ७० लाख रुपैयाँ तथा भारत, दक्षिण कोरिया, नेदरल्याण्डस र मलेसियाबाट ५/५ करोड रुपैयाँ भित्रिएका छन् ।
