काठमाडौं । लकडाउनको अवधिमा नेपाल वायुसेवा निगम (नेपाल एयरलाइन्स) ले २२ वटा अन्तर्राष्ट्रि चार्टर्ड उडान गरेको छ ।
लकडाउनको साढे २ महिनाको अवधिमा निगमले १३ यात्रु चार्टर्ड र ९ कार्गो चार्टडसहित २२ अन्तर्राष्ट्रिय उडान गरेको हो । जुन नेपालबाट अन्तर्राष्ट्रिय उडान गर्ने वायु सेवा प्रदायक कम्पनीमध्ये सबैभन्दा धेरै हो ।
निगमले यात्रु यात्रु चार्टर्डतर्फ जापानको नारितामा सबैभन्दा धेरै ६ वटा उडान गरेको छ। यसैगरी, हङकङ ३, अष्ट्रेलिया २ बंगलादेशको ढाका र भारतको दिल्ली १/१ वटा उडान गरेको छ।
अष्ट्रेलियाको सिड्नी र ब्रिसबेनमा चार्टर्ड उडान निगमको आफ्नो उड्डयन इतिहासमै वाइडबडी जहाजमार्फत पहिलोपटक लामो गन्तव्य उडान हो ।
लकडाउन यता नेपाल एयरलाइन्सले चीनको ग्वाङ्जाओ र बेइजिङबाट मात्रै आठ कार्गो उडान गरेको छ । यी सबै स्वास्थ्य सामग्री ल्याउन भएका उडान हुन् ।
निगमले चीनका अन्य शहरमा पनि थप कार्गो उडान गर्ने योजना बनाएको छ । तथापि कार्गो उडानको तालिका तय भइनसकेको निगमले उल्लेख गरेको छ ।
निजी क्षेत्रका श्री एयरलाइन्स, हिमालयन एयरलाइन्सले पनि यस अवधिमा अन्तराष्ट्रिय चार्टर्ड उडान गरेका छन् ।नेपालबाट हाल तीन नेपालीसहित ३० वायु सेवा कम्पनीले अन्तर्राष्ट्रिय उडान भर्दै आएका छन् ।
जेठभित्रै थप ४ चार्टर्ड उडान गर्दै
निगमले यही जेठ भित्रै थप चार चार्टर्ड उडान गर्ने भएको छ । आगामी जेठ २१, २२ र २३ गते (जुन ३, ४ र ५ तारिख) मा हङकङका लागि चार्टर्ड उडान गर्ने तालिका रहेको निगमले जनाएकोछ । यी उडानमा पनि निगमका दुई न्यारोबडी र एक वाइडबडी जहाज प्रयोग गरिनेछ ।
त्यसैगरी, तेस्रोपटक अष्ट्रेलियाको राजधानी क्यानबेरामा आगामी जेठ २६ गते (जुन ८ तारिखका दिन) चार्टर्ड उडान गर्दैछ । यो उडान मलेशियाको क्वालालम्पुर हुँदै करिब १३ घण्टाको हुनेछ ।
