काठमाडौं । चालू आर्थिक वर्षको तेस्रो त्रैमासमा एभरेष्ट बैंकको नाफामा सामान्य वृद्धि भएको छ ।
बैंकले सोमबार प्रकाशित गरेको वित्तीय विवरण अनुसार चालू आवको चैत मसान्तसम्ममा २ अर्ब ३५ करोड रुपैयाँ खुद नाफा कमाएको छ ।
यो गत वर्षको सोही अवधिको तुलनामा १४ करोड रुपैयाँ बढी हो । बैंकले गत आवको सोही अवधिमा २ अर्ब २१ करोड रुपैयाँ खुद नाफा कमाएको थियो ।
खुद ब्याज आम्दानी र सञ्चालन मुनाफा बढेसँगै खुद नाफा बढेको हो । चालू आवको तेस्रो त्रैमासम्ममा बैंकले ४ अर्ब ३४ करोड रुपैयाँ खुद ब्याज आम्दानी गरेको छ भने सञ्चालन मुनाफा ३ अर्ब ३६ करोड पुगेको छ।
बैंकको जगेडा कोषमा ७ अर्ब ८१ करोड रुपैयाँ सञ्चित छ भने रिटेन्ड अर्निङ १ अर्ब ८५ करोड र सेयर प्रिमियम २३ करोड रुपैयाँ रहेको छ। बैंकको वितरणयोग्य नाफा ९४ करोड ३६ लाख रुपैयाँ रहेको छ ।
८ अर्ब ५१ करोड रुपैयाँ चुक्ता पूँजी रहेको बैंकले चैत मसान्तसम्म १ खर्ब ४० अर्ब रुपैयाँ निक्षेप संकलन गरी १ खर्ब १४ अर्ब ५९ करोड लाख रुपैयाँ कर्जा प्रवाह गरेको छ।
खुद नाफा बढेसँगै बैंकको प्रतिसेयर आम्दानी २२ पैसाले बढेर ३७.३ रुपैयाँ पुगेको छ । समीक्षा अवधिमा बैंकको खराब कर्जा अनुपात ०.२० प्रतिशत, प्रतिसेयर नेटवर्थ २१६ रुपैयाँ, पूँजीकोष अनुपात १२.६२ प्रतिशत रहेको छ।
