काठमाडौं । सरकारले ठूलै तामझाम सहित ल्याएको सामाजिक सुरक्षा कोषमा सूचिकरण हुने कम्पनीको संख्या कम भएपनि समय थप गरिएको छ । यही साउन १ देखि सबै कम्पनीलाई अनिवार्य रुपमा सूचिकरण हुन भनिएको थियो ।
तर सरकारले भनेजस्तो कम्पनीहरु नआएपछि सामाजिक सुरक्षा कोषले साउन १ गते सार्वजनिक सूचना प्रकाशित गर्दै रोजगारदाता तथा योगदानकर्तालाई कोषमा सूचिकृत हुने समय असोज मसान्तसम्म थपेको हो ।
गत मंसिर ११ गते घोषणा गरिएको योगदानमा आधारित सामाजिक सुरक्षा योजनामा असार मसान्तसम्ममा ३८ सय कम्पनी दर्ता भएका छन् । त्यसमा करिव २० हजार श्रमिक सूचिकृत भएको कोषले जनाएको छ ।
योगदानमा आधारित सामाजिक सुरक्षा योजनामा सहभागि हुनेको आधारभूत पारिश्रमिकको ३१ प्रतिशत रकम जम्मा गर्नुपर्छ । त्यसमा रोजगारदाताले २० प्रतिशत र योगदानकर्ताले ११ प्रतिशत रकम जम्मा गर्नुपर्छ ।
सामाजिक सुरक्षा कोषमा योगदान गर्ने श्रमिकले चार प्रकारका सामाजिक सुरक्षा सुविधा प्राप्त गर्ने कार्य्विधिमा उल्लेख छ । उक्त योजनाअनुसार कोषबाट औषधि उपचार, स्वास्थ्य तथा मातृत्व सुरक्षा, दुर्घटना अशक्तता सुरक्षा, आश्रित परिवार सुरक्षा र वृद्धावस्था सुरक्षा योजनाअनुसारको सामाजिक सुरक्षा प्राप्त गर्नेछन् ।
औषधोपचार, स्वास्थ्य तथा मातृत्व सुरक्षा योजनाअन्तर्गत योगदानकर्ताले चिकित्सकको परामर्श सेवा, अस्पताल भर्ना तथा शल्यक्रियाको शुल्क, रोगको परीक्षण तथा उपचार खर्च, औषधिको विल बमोजिमको खर्च प्राप्त गर्नेछन् ।
यस्तै विभिन्न सुविधा सहित सरकारले योगदानमा आधारित सामाजिक सुरक्षा कोष बनाएको छ । यस्तो व्यवस्था संसारका विभिन्न मुलुकहरुमा समेत रहेको छ ।
यो पनि पढ्नुस्ः लक्षित वर्गमा पुग्न नसकेको योगदानमा आधारित सामाजिक सुरक्षा कार्यक्रम
