कोरोना भाइरसका कारण एशियाली देशहरुमा चामल र गहुँको मूल्य आकाशिएको छ । पर्याप्त आपूर्तिका बाबजूद भण्डारण अत्याधिक रुपमा भइरहेकाले चालमको मूल्य ७ वर्षयताकै उच्च मूल्यमा पुगेको छ ।
राइस एक्सपोटैर्स एसोसिएशनका अनुसार, चामलको मूल्य २५ मार्चदेखि १ अप्रिलका बीचमा १२ प्रतिशतले बढिसकेको छ । रोयटर्सका अनुसार, अप्रिल २०१३ पछि चामलको मूल्य सबैभन्दा उच्च स्तरमा पुगेको हो ।
इन्टरनेशनल पोटेटो सेन्टर एशियाका रीजनल डाइरेक्टरका अनुसार, कोरोनाका कारण अरु क्षेत्रजस्तै कृषि क्षेत्र पनि नराम्रोसँग प्रभावित भएको छ ।
विश्वमा आपूर्ति हुने चामलको ९० प्रतिशत उत्पादन एशियामा हुने गर्दछ । लकडाउनका कारण कामदारहरु नभएकाले भारतका चामल व्यापारीहरुले आपूर्तिको नयाँ कन्ट्रयाक्ट लिइरहेका छैनन भने भियतनाम सरकारले पनि आपूर्ति घटाएको छ । जसका कारण चामलको मूल्य तीव्र रुपमा बढ्न पुगेको हो ।
विश्वभरमा चामलको मात्र नभई गहुँको मूल्यमा पनि उछाल आएको छ । उत्तरी अमेरिका र यूरोप सहित कयौँ देशहरुमा लकडाउनका कारण गहुँको माग बढेको छ । यस्तोमा मार्चको दोस्रो हप्तामा गहुँको मूल्यमा १५ प्रतिशतको बढोत्तरी आएको छ ।
विश्लेषकहरुका अनुसार आगामी दिनहरुमा गहुँ र चामलको मूल्य अझै महँगो हुनेछ ।
-एजेन्सी
