काठमाडौं। विश्वव्यापी फैलिएको कोरोना भाइरसले विश्व अर्थतन्त्र नै प्रभावित हुन थालेपछि डलरको भाउ आकाशिएको छ । अमेरिकी डलरको विनियम दर अहिलेसम्मकै उच्च विन्दुमा पुगेपछि नेपाली मुद्रा हालसम्मकै कमजोर भएको छ।
कोरोना प्रभाव विश्वव्यापी रुपमा बढ्दै गएको र अमेरिकी डलरको तुलनामा भारतीय मुद्रा समेत कमजोर भएपछि त्यसको प्रभाव नेपाली मुद्रामा परेको हो ।
बिहीबारका लागि नेपाल राष्ट्र बैंकले १ अमेरिकी डलरको विनिमय दर १२२ रुपैयाँ ५० पैसा (बिक्रीदर) तोकेको छ । यो हालसम्मकै उच्च हो । यसअघि गत चैत ११ मा यस्तो विनिमय दर १२२ रुपैयाँ ३४ पैसा पुगेको थियो ।
बिहीबारका लागि राष्ट्र बैंकले १ अमेरिकी डलरको खरिद दर १२१ रुपैयाँ ९० पैसा तोकेको छ । डलरको आधार मूल्य ११८ रुपैयाँ ३२ पैसा तोकेको छ।
लामो समय १११ देखि ११४ रुपैयाँको हाराहारीमा रहेको डलर पछिल्ला महिनादेखि निरन्तर उकालो लागेको छ ।
