काठमाडौं । सरकारले नेपाल राष्ट्र बैंकका गभर्नरमा पूर्व डेपुटी गभर्नर तथा लगानी बोर्डका प्रमुख कार्यकारी अधिकृत महाप्रसाद अधिकारीलाई नियुक्त गरेको छ । सोमबार बालुवाटारमा बसेको मन्त्रिपरिषद् बैठकले अधिकारीलाई नियुक्त गरेको हो ।
अर्थमन्त्री डा. युवराज खतिवडाको संयोजकत्व गठित सिफारिस समितिले नयाँ गभर्नरका लागि महाप्रसाद अधिकारी, अर्थमन्त्रालयका पूर्वसचिव राजन खनाल र डेपुटी गभर्नर चिन्तामणि शिवाकोटी नाम सिफारिस गरेको थियो ।
समितिको सिफासिर अनुसार अर्थमन्त्री खतिवडाले मन्त्रिपरिषद्मा गभर्नर नियुक्ति गर्नका लागि प्रस्ताव पेश गरेका थिए । सिफारिस तीन व्यक्तिमध्ये मन्त्रिपरिषद्ले अधिकाराीलाई गभर्नरमा नियुक्त गरेको हो ।
राष्ट्र बैंकमा ५ वर्षे कार्यकाल पूरा गरी डा. चिरञ्जीवि नेपाल चैत ४ गते राष्ट्र बैंकबाट अवकाश भएका थिए । त्यसयता गभर्नरको पद रिक्त थियो ।
राष्ट्र बैंककै डेपुटी गभर्नरबाट अवकास पाएका अधिकारीसँग राष्ट्र बैंकमा ३ दशक काम गरेको अनुभव छ । उनले ५ वर्ष डेपुटी गभर्नरको रुपमा समेत काम गरेका थिए ।
