काठमाडौं । विश्वभर फैलिएको कोरोना भाइरसको असर नेपालमा दैनिक खाद्य वस्तु र व्यापारमा देखिए पनि तरकारी आयातमा भने खासै असर नपरेको देखिएको छ ।
चालू आर्थिक वर्षको पहिलो ७ महिनाको (श्रावण फागुन) अवधिमा तरकारी आयातमा वृद्धि भएको छ । गत आवको सोही ७ महिनाको तुलनामा चालू आवमा तरकारीको अयातमा ६ प्रतिशतले वृद्धि भएको भन्सार विभागको तथ्यांकले देखाएको हो ।
चालू आर्थिक वर्षको माघसम्ममा १८ अर्ब ५ करोड २२ लाख १३ हजार रुपैयाँ बराबरको तरकारी आयात भएको तथ्यांकले देखाएको छ ।
गत आर्थिक वर्षको सोही अवधिमा १७ अर्ब २ करोड ५९ लाख ५९ हजार रुपैयाँ बराबरको तरकारी आयात भएको थियो ।
चालू आवको ७ महिनामा करिब २ अर्ब २७ करोड रुपैयाँ बराबरको लसुन, प्याज तथा टमाटर आयात भएको छ । सो अवधिमा करिब १ अर्ब ७६ करोड रुपैयाँको प्याज आयात भएको तथ्यांकले देखाएको छ । सो अवधिमा ४ करोड ५१ लाख केजी प्याज आयात भएको छ ।
यस्तै ३३ करोड ४६ लाख रुपैयाँ बराबरको गोलभेँडा आयात भएको छ । सो मूल्यमा २ करोड ९२ लाख केजी गोलभेडा आयात भएको हो । विभागको तथ्यांक अनुसार सो अवधिमा १८ करोड ११ लाख रुपैयाँको लसुन आयात भएको छ । सो मूलयमा १७ लाख ९० हजार लसुन आयात भएको हो ।
गत आर्थिक वर्ष २०७५/७६ मा नेपालले करिब ३ अर्ब ४६ करोड रुपैयाँ बराबरको लसुन, प्याज तथा टमाटर आयात भएको थियो । सो आवमा २ अर्ब ९३ करोड रुपैयाँ बराबरको प्याज आयात गरेको थियो । सो मूल्यमा कुल ९ करोड २५ लाख केजी प्याज आयात भएको थियो ।
यस्तै २९ करोड ५० लाख रुपैयाँ बराबरको गोलभेँडा आयात भएको थियो । सो रकममा ५ करोड २८ लाख केजी गोलभेँडा आयात भएको हो । सो अवधिमा करिब २४ करोड ५८ लाख रुपैयाँको लसुन आयात भएको थियो । उक्त रकममा ३ लाख ४९ हजार केजी लसुन आयात भएको विभागको तथ्यांकले देखाएको छ ।
