काठमाडौं । पछिल्लो समय कोरोना (कोभिड १९) संक्रमण विश्वभर फैलिरहेको बेला त्यसले नेपालीहरुको दैनिक जिवनमा समेत फरक पार्न थालेको छ । पछिल्लो समय मानिसहरु कोरोना भाइरसको त्रासका कारण घरमा दैनिक आवश्यकतामा पर्ने खाद्य तथा अन्य सामग्रीहरु थुपार्न थालेका छन् ।
केही समययता नुन, चिनी, तेल, दाल, चामल, ग्यास, मास्क, सेनिटाइजर लगायतका सामग्रीहरुको स्टकमा घरमै राख्न थालेका हुन् ।
नुन किन्न आएकी कोटेश्वर निवासी कल्पना कार्कीले अब नुन नपाउने भन्दै एकै दिनमा ४ पोका नुन खरिद गरेकी छिन् । उनले कोरोनाको कारण नुन नपाउने डरले अहिले किनी राखेको बताइन् । ‘पसलमा नुन पाइएन भने के गर्ने भनेर अलि बढि किनेको,’ कार्कीले भनिन् ।
कार्की एक उदाहरण मात्र हुन । उनी जस्ता धेरै त्रसित नेपालीहरु छन् जसले नुन, चिनी, दाल, चामल, ग्यास लगायतका दैनिक उपभोग्य वस्तु आवश्यकता भन्दा बढि किन्न थालका छन् । यसले बजारमा ति वस्तुको खरिद विक्रीलाई सन्तुलनमा ल्याउन सकेको छैन ।
यसरी एकै साथ २/३ महिनाका लागि खाद्य वस्तु किनेर थन्काउँदा बजारमा सो सामग्रीको अभाव देखिने भएको हो ।
यस्तै, साल्ट ट्रेडिङका सुचना अधिकारी कुमार राजभण्डारी नुनमा आत्तिनु नपर्ने बताउँछन् । उनले ट्रेडिङसँग १० महिनाभन्दा बढिलाई देशभरका जनताका लागि पुग्ने नुन भएको दाबी गरे । हाल ट्रेडिङसँग १ लाख ५५ हजार टन नुन स्टकमा रहेको उनले बताए । डिलरहरुको माग अनुसार नुन वितरण भइरहेकाले त्यसमा कुनै अभाव सृजना नहुने उनले बताए ।