काठमाडौं । नेपाल राष्ट्र बैंकले ३ अर्ब १३ करोड रुपैयाँ बराबरको ट्रेजरी बिल जारी गर्ने भएको छ ।
केन्द्रीय बैंकले मंगलबार बोलकबोल प्रक्रियाका माध्यमबाट उक्त परिमाणको ट्रेजरी बिल बिक्री गर्न लागेको हो ।
बैंकले एक सूचनामार्फत ९१ दिने अवधिका लागि ट्रेजरी बिल बिक्री गर्न लागेको जनाएको छ ।उक्त ट्रेजरी बिल आगामी जेठ २० गते परिपक्व हुनेछ ।
केन्द्रीय बैंकले मंसिर २० गते जारी गरेको ट्रेजरी बिल मंगलबार परिपक्व हुने भएपछि त्यसलाई नवीकरण गर्दै पुनः जारी गर्न लागेको हो ।
३ अर्ब १३ करोडमध्ये १५ प्रतिशत रकम अप्रतिस्पर्धी बिडरका लागि आरक्षण गरिएको छ । यसअघि फागुन १२ गते जारी गरिएको २ अर्ब २३ करोडको ट्रेजरी बिलमा १० अर्ब ३४ करोड रुपैयाँको आवेदन परेको थियो ।
