विख्यात ‘इनर्जी ड्रिङक’ रेडबुलको व्यापार गत वर्ष अत्याधिक बढेको छ । अस्ट्रियन ब्रान्ड रेडबुलले गत वर्ष विश्वका सबै मानिसहरूलाई एक-एक क्यान वितरण गर्न पुग्ने परिमाणमा रेडबुलको उत्पादन गरेको थियो ।
रेडबुलको विक्री गत वर्ष ७.५ अर्ब क्यान भएको कम्पनीले जनाएको छ । उत्पादनको विक्री अत्याधिक रूपमा ब्राजिल, भारत र अफ्रिका जस्ता उदाउँदा बजारमा भएको हो । हाल विश्वमा करीब ७.७ अर्ब मानिस छन् । कम्पनीले खेलकुदको क्षेत्रमा धेरै र आक्रामक रूपमा प्रायोजन गरिरहेको छ ।
उच्च व्यापारका कारण कम्पनीको कारोबारमा ९.५ प्रतिशतको बढोत्तरी भएर ६.६ अर्ब डलर पुगेको छ । कम्पनीले नाफा भने खुलाएको छैन । तर, नाफामा पनि आकर्षक बढोत्तरी भएको कम्पनी स्रोतले बताएको छ । यसको मतलब कम्पनीका अर्बपति मालिकहरुको सम्पत्ति पनि राम्रैसँग बढेको अनुमान गर्न गाह्रो छैन । कम्पनीले सन् २०१९ मा ५० करोड युरो लाभांश वितरण गरको थियो ।
कुनै समय हाँस पाल्ने किसान र सानोतिनो व्यवसाय गरिरहेका थाइल्याण्डका च्यालियो योभिद्याले अस्ट्रियन मार्केटिङ पन्डित डेट्रिच माट्चेससँग मिलेर सन् १९८७ मा यो कम्पनीको स्थापना गरेका थिए । माट्चेसले च्यालियोको कम्पनीले बनाइरहेको इनर्जी ड्रिङ्कको राम्रो सम्भावना देखेका थिए, व्यवसायीक भ्रमणको बेला ‘जेट ल्याग’ भएर केही पिय पदार्थ खोजिरहेका बखत ।
रेडबुलको स्वामित्व माट्चेस र योभिद्याको परिवारसँग रहेको छ । उनीहरुले पत्ता लगाएर र प्रभावकारी बजारिकरण गरेको ‘टनिक’ले उनीहरु दुवैलाई अर्बपति बनाएको छ । माट्चेस हाल अस्ट्रियाको सबैभन्दा धनी व्यक्ति हुन् । उनको कुल सम्पत्ति १२.४ अर्ब डलर रहेको छ ।
उनीहरूले यो वर्ष जति रेडबुल बेचे, त्यो भनेको दैनिक २ करोड र प्रत्येक घण्टा ८ लाख ५० हजार क्यानको विक्री हो । वृद्धि सबैभन्दा बढी भारतमा रहेको छ । भारतमा व्यापार ३७ प्रतिशतले बढेको छ भने ब्राजिलमा ३० र अफ्रिकामा २५ प्रतिशतले व्यापार बढेको छ ।
