एभरेष्ट बैंकले चालु आर्थिक वर्षको दोस्रो त्रैमाससम्म १ अर्ब ५० करोड ९८ लाख रुपैयाँ खुद नाफा कमाएको विवरण सार्वजनिक गरेकाे छ । गत वर्षको यसैअवधिमा भने बैंकले १ अर्ब ४२ करोड ९९ लाख रुपैयाँ मात्र खुद नाफा कमाएको थियो । यो नाफा गत वर्षको भन्दा ५.५८ प्रतिशतले अर्थात ७ करोड ९९ लाख रुपैयाँ बढी हो ।
बैंकको खुद ब्याज आम्दानी ८.६६ र सञ्चालन नाफा ५.५७ प्रतिशतले बढेको छ भने पुस मसान्तसम्म बैंकको निक्षेप संकलन र कर्जा प्रवाह पनि १३.७० र ७.९३ प्रतिशतले बढेको छ । हाल बैंकको चुक्ता पुँजी ८ अर्ब ५१ करोड रुपैयाँ रहेको छ । यो गत वर्षको भन्दा ४.९७ प्रतिशतले धेरै हो । गत वर्ष बैंकको चुक्ता पुँजी ८ अर्ब १० करोड ६८ लाख रुपैयाँ रहेको थियो । यसको रिजर्भ कोषमा भने विशाल ७ अर्ब २६ करोड ७४ लाख रुपैयाँकाे काेष रहेकाे छ ।
वार्षिकीकरण गर्दा बैंकको प्रतिसेयर आम्दानी ३५ रुपैयाँ ६५ पैसा र प्रतिसेयर नेटवर्थ २०७ रुपैयाँ ४ पैसा रहेको छ ।
त्यस्तै सनराइज बैंकले चालु आर्थिक वर्षको दोस्रो त्रैमाससम्म आइपुग्दा ९४ करोड ४३ लाख ८८ हजार रुपैयाँ खुद नाफा कमाएको छ । यो गत वर्षको यसैअवधिमा भन्दा १९.१२ प्रतिशतले अर्थात १५ करोड १६ लाख रुपैयाँ बढी हो । गत वर्ष बैंकले ७९ करोड २७ लाख ५३ हजार रुपैयाँ खुद नाफा कमाएको थियो । पुस मसान्तसम्म आइपुग्दा बैंकको वितरण योग्य नाफा ५१ करोड ९० लाख ३८ हजार रुपैयाँ रहेको छ ।
बैंकको खुद ब्याज आम्दानी र सञ्चालन नाफा बढेसँगै खुद नाफा बढ्न टेवा पुगेको हो । खुद ब्याज आम्दानी १८.९३ प्रतिशतले बढेर २ अर्ब ४ करोड ७४ लाख ३५ हजार रुपैयाँ पुगेको छ । सञ्चालन नाफा १८.४२ प्रतिशतले बढेर १ अर्ब ३४ करोड ५१ लाख ५० हजार रुपैयाँ पुगेको छ ।
सनराइजको प्रतिसेयर आम्दानीवार्षिकीकरण गर्दा १ रुपैयाँ ६१ पैसाले बढेर २१ रुपैयाँ ०६ पैसा पुगेको छ । प्रतिसेयर नेटवर्थ १४२ रुपैयाँ २६ पैसा छ । योसँगै बैंकको खराब कर्जा पनि बढेको छ । खराब कर्जा ०.४३ प्रतिशतले ले बढेर १.६९ प्रतिशत पुगेको छ । पुस मसान्तसम्म आइपुग्दा वेसरेट ९.९९ प्रतिशतले कायम भएको छ ।
