काठमाडौं। अमेरिकी राष्ट्रपति डोनाल्ड ट्रम्पले युरोपेली संघ (ईयू) बाट आउने कारसहितका उत्पादनहरूमा २५ प्रतिशत कर लगाउने योजना बनाएको बताएका छन् ।
ट्रम्पले बुधबार आफ्नो मन्त्रिपरिषद्का सदस्यहरूसँगको भेटमा पत्रकारहरूलाई यस्तो जानकारी दिएका हुन् । उक्त निर्णय चाँडै कार्यान्वयनमा ल्याइने ट्रम्पले बताएका छन् ।
‘हामी चाँडै नै यसको घोषणा गर्नेछौं,’ ट्रम्पले भने, ‘यो सामान्यतया २५ प्रतिशत हुनेछ । त्यो कार र अन्य सबै कुराहरूमा हुनेछ ।’
उनले इएयूलाई ‘संयुक्त राज्य अमेरिकालाई फसाउन’ सिर्जना गरिएको समूह रहेको दाबी गरेका छन् । अमेरिकाको युरोपेली संघसँग करिब ३०० अर्ब डलरको व्यापार घाटा रहेको उनले बताए ।
अमेरिकासँग उनीहरूले फरक तरिकाले फाइदा उठाएको भन्दै ईयूले आफ्ना उत्पादनहरू स्वीकार नगरेको आरोप लगाए । ईयूले मूलतः कृषि उत्पादनहरू स्वीकान नगर्ने उनको भनाइ छ ।
युरोपेली संघले भने ‘अनुचित करहरू विरुद्ध दृढतापूर्वक र तुरुन्तै प्रतिक्रिया दिने’ बताएको छ ।
ट्रम्पले सत्ता सम्हाले लगत्तै क्यानडा र मेक्सिकोलाई २५ प्रतिशत कर लगाएका थिए । त्यसको चौतर्फी विरोध भएपछि १ महिनाका लागि स्थगित गरेका थिए ।
त्यस्तै, फेब्रुअरीदेखि चीनलाई पनि १० प्रतिशत कर लगाएको छ ।
