काठमाडौं । लुम्बिनी केबलकार लिमिटेडको आम्दानी एक वर्षमै ६ गुणाले बढेको छ ।
कम्पनीले गत वर्ष (सन् २०२४) मा १३ करोड ३० लाख रुपैयाँ आम्दानी गरेको रेटिङ एजेन्सी इक्रा नेपाल लिमिटेडले जनाएको छ ।
यो सन् २०२३ को भन्दा ५०४ प्रतिशत धेरै हो । सन् २०२३ मा यस कम्पनीले २ करोड २० लाख रुपैयाँ आम्दानी गरेको थियो ।
कम्पनीले २०८० जेट १५ गतेदेखि केबलकार सञ्चालनमा ल्याएको थियो । कम्पनीलाई लङ ट्रम १ अर्ब ४० लाख रुपैयाँ बैंक कर्जाका लागि इक्राले ‘इक्राएनपी एलबी प्लस’ रेटिङ दिएको छ ।
बुटवल उपमहानगरपालिका-३, गोलपार्क बमघाटदेखि पाल्पाको तिनाउ गाउँपालिका-३ वसन्तपुरसम्म करिब २.६ किलोमिटर दूरीको भएको यो लुम्बिनी प्रदेशकै पहिलो केबलकार हो ।
आइएमई समूहले सञ्चालनमा ल्याएको यो तेस्रो केबलकार हो । यसअघि आइएमई समूहले काठमाडौंको चन्द्रागिरि र नवलपुरको गैंडाकोटमा मौलाकालिका केबलकार सञ्चालनमा ल्याइसकेको छ ।
आइएमई ग्रुपले केबलकार, क्यासिनोसहितको १५० कोठाको पाँचतारे होटल, रेष्टुरेण्ट, मन्दिरलगायत संरचना निर्माण गरी संचालनमा ल्याएको हो ।
टप स्टेशनमा १ अर्ब ५० करोड लागतमा १५० कोठा, क्यासिनो, एक हजार जना क्षमताको बैंक्वेट हल र स्वीमिङ पुल सहितको पाँचतारे होटेल बन्दैछ ।
केबलकारमा २५ गोण्डुला रहेका छन् भने एउटा गोण्डुलामा एकैपटक आठ जनाले यात्रा गर्न सक्नेछन् । केबलकारमा प्रतिघण्टा अधिकतम ६०० यात्रु आवातजावत गर्न सक्ने छन् ।
