काठमाडौं । नेपाल वायुसेवा निगमले दशैंको फूलपाती (असोज २४ गते) को दिन न्यारोबडी जहाजबाट गर्ने काठमाडौं-भैरहवा उडानको सबै टिकट बिक्री भएको छ ।
टिकट बुकिङ खुलाएको करिब १२ घण्टामा सबै टिकट बिक्री भएको हो । निगमका अनुसार हिजो बेलुका १ घण्टा टिकट बुकिङ खुलाएकोमा ७० वटा बिक्री भएको र आज बिहान बाँकी ८८ वटा गरी सबै १५८ वटै टिकट बिक्री भएको हो ।
चाडपर्वको बेलामा राजमार्गहरु बाढीपहिरोले क्षतिग्रस्त हुँदा स्थल आवागमनमा कठिनाई भएकाले यात्रुको सुविधाका लागि निगमले आन्तरिक उडानमा पहिलोपटक न्यारोबडी जहाजबाट भैरहवा उडान गर्न लागेको हो ।
२४ गते भैरहवाको निर्धारित उडानको सबै टिकट बिक्री भइसकेकाले अब अन्तर्राष्ट्रिय उडानलाई असर नपर्नेगरी अर्को पनि उडान गर्ने बारे छलफल भइरहेको निगमले बताएको छ ।
निगमका प्रवक्ता रमेश पौडेलका अनुसार असोज २४ गते बिहान ११ बजे काठमाडौंबाट भैरहवाका लागि जहाज उड्ने छ । सोही जहाज मध्याह्न १२:३० बजे भैरहवाबाट काठमाडौं फर्कने उडान तालिका रहेको छ ।
काठमाडौं-भैरहवाको एकतर्फी भाडादर ७ हजार रुपैयाँ र भैरहवा-काठमाडौंको ३ हजार ८९० रुपैयाँ तोकिएको छ । यात्रुले ३० केजीसम्म लगेज निःशुल्क ल्याउन पाउने निगमले जनाएको छ ।
