काठमाडौं । व्यवसायी विजय कुमार शाह परिवारले डा. भगवान कोइरालाको नेतृत्समा निर्माण हुन लागेको बाल अस्पातल निर्माणका लागि ४ करोड आर्थिक सहयोग गर्ने भएको छ ।
शाहले काठमाडौं इन्स्टिच्युट अफ चाइल्ड हेल्थ (केआइओसीएच)को बाल शल्य चिकित्सा इन्टेन्सिभ केयर युनिट पीएसआइसीयू र डे केयर सर्जरी शाखाको भौतिक संरचना निर्माणका लागि उक्त सहयोग गर्ने भएका हुन् ।
यो सहयोग शाह परिवारको निजी सम्पत्तिबाट प्रदान गर्न लागिएको हो । शाह तीन पटकसम्म नेपालकै शिर्ष करदाता बनेका व्यक्ति हुन् ।
शाह परिवारले प्राथमिक चरणमा भदौ १३ गते १ करोड रुपैयाँ केआइओसीएचलाई प्रदान गरिसकेको छ । बाँकी ३ करोड रुपैयाँ निर्माण योजना सुरु भएपछि जेजीआई नेपाल फाउण्डेसनको समन्वय र सहजीकरणमा आर्थिक रुपमा प्रदान गरिनेछ ।
शाह परिवारका तर्फबाट गरिएको योगदानले नेपालमा बालस्वास्थ्य सेवामा उल्लेखनीय सुधार गर्नेछ । जसका माध्यमबाट विशेष स्याहारको आवश्यकता परेका बालबालिकाहरूको गम्भीर अवस्थाको शल्यक्रिया गर्न सकिनेछ । शाह परिवारको महत्वपूर्ण सहयोगको सम्मान गर्दै पीएसआइसीयू र डे केयर सर्जरी शाखाको तल्लालाई रुस्लान पीएसआइसीयू नामाकरण गरिनेछ ।
गैरनाफामूलक संस्था जेजीआई नेपाल फाउण्डेसन (जेजिआइएनएफ)ले यस सहयोग प्रक्रियाको समन्वय एवं सहजीकरण गरीरहेको छ ।
नयाँ पीएसआइसीयू र डे केयर सर्जरी शाखाद्धारा सेवाको खाँचोमा रहेका बालबालिकालाई विशिष्ट सहयोग हुनेछ । स्वास्थ्य उपचारका निम्ति अन्य मुलुक धाउनुपर्ने बाध्यता समेत यसको निर्माणले कम हुनेछ । शाह परिवारको परोपकारी सहयोगका कारण नेपालको बालस्वास्थ्य सेवाको उल्लेखनिय सुधार हासिल हुनेछ विश्वास लिइएको छ ।
