काठमाडौं । देशका मुख्य राजमार्गहरू बन्द हुँदा हवाई टिकट पाउनै मुस्किल भएको छ । शुक्रबारदेखि परेको अबिरल वर्षाका कारण मुख्य राजमार्गमा यातायात ठप्प हुँदा हवाई उडानमा अत्यधिक चाप देखिएको हो ।
शुक्रबारदेखि रोकिएको आन्तरिक हवाई सेवा आज बिहानैदेखि नियमित संचालनमा आएको छ । तर, यसअघि रोकिएका हवाई यात्रु र सडक बन्द हुँदा थपिएका यात्रुका कारण हवाई टिकट पाउनै कठिन भएको हो ।
आज सबै गन्तव्यमा जहाज पूर्णक्षमतामा संचालनमा आए पनि यात्रुको संख्या अधिक हुँदा टिकट पाउनै मुस्किल रहेको छ । नयाँ टिकटको माग धान्न धौधौ भइरहेको एयरलाइन्स कम्पनीहरूले जनाएका छन् ।
आज बेलुकासम्मै मौसम अनुकूल रहे रात्रिकालीन उडान गरेर भए पनि यात्रु ओसार्ने योजना बनाइएको एयरलाइन्स कम्पनीहरूले बताएका छन् ।
अधिकांश गन्तव्यको आजका लागि टिकट सोल्ड आउट भइसकेका छन् । भद्रपुर, भरतपुर, लगायत गन्तव्यको पर्सीसम्मको टिकट पाउने अवस्था छैन ।
एयरलाइन्सहरूले यात्रुको सेवा दिने बताइ रहे पनि भाडा भने अचाक्ली बढाएका छन् । टिकटको माग ह्वात्तै बढेपछि एयरलाइन्स कम्पनीहरूले केही गन्तव्यको भाडादर झण्डै दोब्बरसम्म बढाएका छन् ।
सामान्य अवस्थामा काठामाडौं-विराटनगर रुटको भाडा साढे ५ हजार हुने गरेकोमा आज ९ हजार ९०० रुपैयाँ हजार पुर्याएका छन् ।
त्यस्तै, काठमाडौं भैरहवाको ४ हजार हाराहारी रहेको हवाई भाडा साढे ६ हजार पुगेको छ । त्यसैगरी, सुर्खेतका लागि साढे १२ हजार, भद्रपुर १२ हजार २०० रुपैयाँ, नेपालगञ्ज ९ हजार ३०० रुपैयाँ, जनकपुरको ४ हजार ९०० रुपैयाँ, सिमरा ४ हजार रुपैयाँ पुर्याएका छन् । यी गन्तव्यहरूमा एयरलाइन्सहरूले न्यूनतम २० देखि ५० प्रतिशतसम्म भाडा बढाएका छन् ।
त्रिभुवन विमानस्थल कार्यालयका अनुसार आज अन्तर्राष्ट्रिय वायुसेवा कम्पनीले समेत उडान संख्या बढाएका छन् । यसले विमानस्थलमा उडानको व्यवस्थापन मिलाउन चाप भएको हो ।
बाढीपहिरोका कारण राजधानी काठमाडौं आउने मुख्य नागढुंगा–मुग्लिन, बीपी राजमार्ग लगायत सडक बन्द छ । ती राजमार्ग खुलाउन अझै समय लाग्ने बताइएको छ ।
