काठमाडौं । हेटौँडा कुलेखानी सिस्नेरी हुँदै काठमाडौँ आउने सडक पुनः सञ्चालन गरिएको छ ।
उक्त खण्डको छैमलेमा सडक स्तरोन्नति तथा कालोपत्र गर्न सवारी चापका कारण समस्या भएको भन्दै दक्षिणकाली नगरपालिकाले असोज ८ देखि १९ गतेसम्म बन्द गरेको थियो ।
तर, दशैंको पूर्वसन्ध्यामा सवारीसाधनमा सञ्चालनमा रोक लगाउँदा समस्या हुने भएकाले हाललाई सडक कालोपत्रको काम स्थगित गरेर सवारीसाधनको आवतजावत खुला गरिएको हो ।
दक्षिणकाली नगरपालिकाले सडक कालोपत्र गर्ने कार्य अहिलेलाई स्थगित गरेर सवारीसाधनमा सञ्चालनमा रोक नलगाइएको जानकारी दिएको छ । दक्षिणकाली–छैमले खण्ड कालोपत्र गर्न १२ दिन सवारी आवागमनमा रोक लगाइने सूचना नगरपालिकाले जारी गरेको थियो ।
स्तरोन्नति गर्ने निर्माण व्यवसायीले हाललाई स्तरोन्नति गर्न नसक्ने बताएपछि जिल्ला प्रशासन कार्यालय काठमाडौँले आजदेखि सिस्नेरी भएर सञ्चालन हुने यातायात पुनः सञ्चालन गरिएको जानकारी दिएको छ ।
