काठमाडौं । नेपाल स्टक एक्सचेन्ज (नेप्से)मा सूचीकृत दुई बीमा कम्पनीले झण्डै ३० लाख कित्ता संस्थापक (प्रमोटर) सेयर लिलामीमा ल्याएका छन् ।
सूर्य ज्योति लाइफ इन्स्योरेन्सले ८ लाख १ हजार ४७६ कित्ता र प्रभु महालक्ष्मी लाइफ इन्स्योरेन्सले २१ लाख ९६ हजार कित्ता संस्थापक सेयर लिलामीमा ल्याएका हुन् ।
एनआइसी एशिया बैंकले आफ्नो स्वामित्वमा रहको सूर्यज्योति लाइफको ८ लाख १ हजार ४७६ कित्ता सेयर बिक्रीमा राखेको हो । उक्त सेयरमा हाल संस्थाका विद्यमान संस्थापक सेयरधनीले मात्र आवेदन दिन पाउनेछन् ।
इच्छुक लगानीकर्ताले आजको ३५ दिनभित्र आफूले किन्न चाहेको सेयर संख्या र मूल्य खुलाइ एनआइसी एशिया क्यापिटल, थापाथली, काठमाडौंमा आवेदन दिनुपर्नेछ । कम्पनीको न्यूनतम सेयर मूल्य प्रतिकित्ता २०८ रुपैयाँ तोकिएको छ ।
त्यस्तै, प्रभु महालक्ष्मी लाइफका विद्यमान सेयरधनीको नामा रहेको २१ लाख ९६ हजार कित्ता संस्थापक सेयर बिक्रीमा ल्याएका छन् ।
कम्पनीको उक्त लिलामी सेयरमा यसमा कम्पनीका विद्यमान अन्य संस्थापक सेयरधनीले आवेदन दिन सक्नेछन् । सेयर खरिद गर्न इच्छुक संस्थापक सेयरधनीले आजको ३५ दिन भित्र कम्पनीको केन्द्रीय कार्यालय, कमलादी, काठमाडौंमा बोलपत्र पेश गर्नुपर्नेछ ।
कम्पनीको सेयर मूल्य न्यूनतम प्रतिकित्ता २०३ रुपैयाँ नघटाइ आवेदन दिनुपर्नेछ । लगानीकर्ताले कम्तीम २ लाख कित्ताका लागि आवेदन दिनुपर्नेछ ।
