काठमाडौं । सेयर बजारमा लगातार दोहोरो अंकको गिरावट आएको छ । बुधबार एकैदिन ९० अंकले घटेको नेप्सेमा आज पनि १२ अंकको गिरावट आएको हो । नेप्सेमा दिनभरमा ७१ अंकको उतरचढाव आएको थियो ।
बिहीबार नेप्से परिसूचक १२.१० अंकले घटेर २७२७.३६ बिन्दुमा आइपुगेको छ । ३१६ कम्पनीको २ करोड १ लाख ५३ हजार ९९३ कित्ता सेयर किनबेच भएको छ ।
सूचकसँगै आज कारोबार रकममा पनि भारी गिरावट आएको छ । अघिल्लो दिनको तुलनामा कारोबार रकम साढे ३ अर्बले घटेर ९ अर्ब ६५ करोड रुपैयाँमा सीमित भएको छ । यो डेढ महिना यताकै कम हो ।
आज कारोबारमा आएका १३ वटा समूह मध्ये माइक्रोफाइनान्स र व्यापार बाहेक अरु सबै समूहको परिसूचक राताम्मे भएको छ । माइक्रोफाइनानस समूह सबैभन्दा धेरै १.६८ प्रतिशतले बढेको छ भने लगानी समूह १.३६ प्रतिशतले घटेको छ ।
आज नेपाल फाइनान्सको सर्वाधिक ४० करोड ५० लाख रुपैयाँको सेयर किनबेच भएको छ । त्यस्तै, एनएलजी इन्स्योरेन्सको ३४ करोड बढीको कारोबार भएको छ ।
आज कारोबारमा आएका मध्ये १०२ कम्पनीको सेयर मूल्य बढेको छ भने १३८ कम्पनीको घटेको छ ।
घट्दो बजारमा पनि आज आत्मनिर्भर लघुवित्तको सेयर मूल्य ठ्याक्कै १० प्रतिशतले बढेको छ । नेपाल फाइनान्सका सेयरधनीले भने सर्वाधिक ८.९१ प्रतिशत गुमाएका छन् ।
