काठमाडौं । घोराही सिमेन्ट नोक्सानी उल्लेख्य रुपमा बढेको छ । कम्पनीले बुधबार सार्वजनिक गरेको गत आर्थिक वर्ष २०८०/८१ को चौथो त्रैमासको अपरिष्कृत वित्तीय विवरण अनुसार १ अर्ब २१ करोड ८८ लाख रुपैयाँ घाटामा छ ।
जबकि घोराही अघिल्लो आव २०७९/८० मा ६ करोड ३१ लाख रुपैयाँ नाफामा थियो । पछिल्लो ३ महिनामा मात्रै कम्पनीको नोक्सानी ५७ करोड ६३ लाख रुपैयाँले बढेको छ । चैतसम्म घोराही ६४ करोड २५ लाख रुपैयाँ घाटामा रहेको थियो ।
बिक्री आम्दानी, बिक्री लागत र खर्च बढ्दा कम्पनी ठूलो नोक्सानीमा गएको हो ।
समीक्षा अवधिमा कम्पनीको बिक्री आम्दानी ३.३० प्रतिशतले घटेर ४ अर्ब ४७ करोड रुपैयाँमा सीमित भएको छ । अघिल्लो वर्ष कम्पनीको यस्तो आम्दानी ४ अर्ब ६२ करोड रुपैयाँ थियो । यस्तै, बिक्री लागत ३ अर्ब ६३ करोड रुपैयाँबाट बढेर ४ अर्ब १६ करोड रुपैयाँ पुगेको छ ।
समीक्षा अवधिमा कम्पनीको प्रशासनिक खर्च बढेर ३३ करोड रुपैयाँ पुगेको छ । त्यस्तै, वित्तीय खर्च ७९.२५ प्रतिशतले बढेर ७६ करोड १७ लाख रुपैयाँ पुगेको छ ।
हाल ४ अर्ब ५६ करोड ७६ लाख रुपैयाँ चुक्ता पूँजी रहेको कम्पनीको रिटेन्ड अर्निङमा २ अर्ब १९ करोड, अन्य जगेडा कोषमा ७ करोड ९० लाख र सेयर प्रिमियममा २ अर्ब ६५ करोड रुपैयाँ संचित छ।
समीक्षा अवधिसम्म कम्पनीको दीर्घकालीन ऋण ६ अर्ब ७३ करोड र अल्पकालीन ऋण ३ अर्ब ३० करोड रुपैयाँ छ ।
घाटामा गएसँगै कम्पनीको प्रतिसेयर आम्दानी २६.६८ रुपैयाँ ऋणात्मक भएको छ । समीक्षा अवधिमा कम्पनीको प्रतिसेयर नेटवर्थ २०७.९३ रुपैयाँ छ ।
