काठमाडौं । गत आर्थिक वर्ष २०८०/८१ मा जीवन बीमा कम्पनीहरूले डेढ खर्ब रुपैयाँ बढी बीमा शुल्क संकलन गरेका छन् ।
नेपाल बीमा प्राधिकरणले सार्वजनिक गरेको तथ्यांक अनुसार गत आवमा १७ बीमा (१४ जीवन बीमा र ३ लघु जीवन बीमा) कम्पनीले कुल १ खर्ब ५६ अर्ब ५० करोड रुपैयाँ बीमा शुल्क संकलन गरेका हुन् ।
गत आवमा १४ जीवन बीमाले १ खर्ब ५६ अर्ब ३३ करोड र ३ लघु जीवन बीमा कम्पनीले १६ करोड ९७ लाख रुपैयाँ प्रिमियम संकलन गरेको प्राधिकरणको तथ्यांक छ ।
अघिल्लो आव २०७९/८० को तुलनामा गत आवमा जीवन बीमा व्यवसाय १४ अर्ब १४ करोड रुपैयाँ अर्थात् ९.९४ प्रतिशतले बढेको हो । अघिल्लो आवमा जीवन बीमा कम्पनीहरूले कुल १ खर्ब ४२ अर्ब ३५ करोड रुपैयाँ प्रिमियम संकलन गरेका थिए ।
पछिल्लो समय अर्थतन्त्र क्रमशः चलयामान हुँदै जाँदा बीमा व्यवसायमा पनि सुधार आएको हो । गत आवमा जीवन बीमा कम्पनीको प्रथम बीमा शुल्क र नवीकरण शुल्क दुवै वृद्धि भएको छ ।
गत वर्ष जीवन बीमा कम्पनीले ३४ अर्ब ५१ करोड ८९ करोड प्रथम बीम शुल्क र १ खर्ब २१ अर्ब ९८ करोड रुपैयाँ नवीकरण शुल्क उठाएको छ । अघिल्लो वर्षको तुलनामा प्रथम बीमा शुल्क सवा ३ अर्ब र नवीकरण शुल्क १० अर्ब ८७ करोड रुपैया बढेको छ ।
गत आवमा प्रिमियम संकलन बढे पनि सक्रिय बीमालेखको संख्या भने घटेको छ । अघिल्लो वर्षको तुलनामा सक्रिय बीमा लेखको संख्या २ लाख ५५ हजार ८२९ वटाले घटेको छ । अघिल्लो आवमा सक्रिय रहेको कुल बीमा लेखको संख्या १ करोड ४१ लाख ३७ हजार ३२१ रहेकोमा गत वर्ष १ करोड ३८ लाख ८१ हजार ४९२ रहेको छ । जबकि यस वर्ष तीनवटा लघु जीवन बीमा कम्पनीहरूको पनि व्यवसाय थपिएको छ ।
नेपाल लाइफको वर्चश्व कायमै
गत वर्ष पनि जीवन बीमा व्यवसायमा नेपाल लाइफको वर्चश्व कायमै रहेको छ । कुल बीमा शुल्क मध्ये नेपाल लाइफ एक्लैले एकचौथाई बढी बीमा शुल्क संकलन गरेको छ । गत वर्ष नेपाल लाइफले मात्रै ४० अर्ब ८५ करोड रुपैयाँ संकलन गरेको छ । यो कुल व्यवसायको २६.१० प्रतिशत हिस्सा हो ।
३ वटा कम्पनी मर्ज भई चुक्ता पूँजीका आधारमा नेपाल लाइफ जत्रै बनेको हिमालयन लाइफ व्यवसायमा भने निकै पछि छ । गत वर्ष व्यवसायका आधारमा हिमालयन लाइफ चौथो स्थानमा रहेको छ । यस कम्पनीले कुल १६ अर्ब ६१ करोड रुपैयाँ बीमा शुलक संकलन गरेको छ ।
गत आवमा नेशनल लाइफले दोस्रो धेरै १९ अर्ब २० करोड रुपैयाँ बीमा शुल्क संकलन गरेको छ । त्यसैगरी, लाइफ इन्स्योरेन्स कर्पोरेसनले १८ अर्ब ११ करोड रुपैयाँ प्रिमियम संकलन गरेको छ ।
५ वटा कम्पनीले ५ देखि १० अर्बको बीचमा बीमा शुल्क संकलन गरेका छन् । जसमा सूर्यज्योति लाइफ ९ अर्ब ५० करोड, राष्ट्रिय जीवन बीमाले ८ अर्ब ७१ करोड, एशियन लाइफले ८ अर्ब ५ करोड, सिटिजन लाइफले ६ अर्ब २२ करोड, सानिमा रिलायन्स लाइफले ६ अर्ब १९ करोड र मेट लाइफ इन्स्यारेन्सले ५ अर्ब ६८ करोड रुपैया बीमा शुल्क संकलन गरेका छन् ।
गत वर्ष ४ कम्पनीको बीमा शुलक ५ अर्ब रुपैयँँभन्दा कम छ । जसमा सन नेपाल लाइफले सबैभन्दा कम ३ अर्ब ८९ करोड रुपैयाँ मात्रै संकलन गरेको छ । त्यस्तै, आइएमई लाइफले ४ अर्ब ७४ करोड, प्रभु महालक्ष्मीले ४ अर्ब ३७ करोड र रिलायबल लाइफले ४ अर्ब २१ करोड रुपैयाँ बीमा शुल्क संकलन गरेका छन् ।
लघु बीमाको हिस्सा नगन्य
लघु जीवन बीमा व्यवसायमा लघु बीमा कम्पनीहरूको हिस्सा नगन्य रहेको छ । गत वर्षदेखि संचालनमा आएका ३ लघु बीमा कम्पनीले वर्षभरीमा जम्मा १६ करोड ९७ लाख रुपैयाँ मात्र प्रिमियम संकलन गरेका छन् । यो कुल जीन बीमा व्यवसायको १.०८ प्रतिशत हो ।
गत वर्ष गार्डियन माइक्रो लाइफले ४ करोड २२ लाख, क्रेष्ट माइक्रो लाइफले ९ करोड ७६ लाख र लिबर्टी माइक्रो लाइफले २ करोड ९९ लाख रुपैयँँ प्रिमियम संकलन गरेका छन् ।
