काठमाडौं । सेयर लगानीकर्ताहरूले सांसदहरूको अभिव्यक्तिका कारण मंगलबार एकैदिन २ खर्ब बढीको नोक्सानी व्यहोर्नुपरेको बताएका छन् ।
चार सेयर लगानीकर्ता संघले विज्ञप्ति जारी गर्दै सेयर बजार विरोधी अभिव्यक्ति दिने सांसदहरू माथि छानबिन गर्नुपर्ने बताएका हुन् ।
सोमबार नेपाली काँग्रेसका सांसद तथा पूर्व अर्थमन्त्री डा. प्रकारशरण महत र स्वतन्त्र सांसद अमरेह कुमार सिंहले स्वार्थ समूहले चलखेल गरी वित्तीय अवस्था कमजोर भएका कम्पनीको सेयर मूल्य अस्वभाविक बढाएको बताएका थिए । मंगलबार नेप्से एकैदिन १४५ अंकले घटेपछि लगानीकर्ताले विज्ञप्ति जारी गरी खेट प्रकट गरेका हुन् ।
लामो समयमसम्म सेयर बजार घट्दा चुप लागेर बसेका सांसदहरूले बढ्न थालेपछि बजार विरोधी अभिव्यक्ति दिएको लगानीकर्ताको भनाइ छ ।
लगानीकर्ताले सेयर बजारमा दबाब सिर्जना गर्ने अभिव्यक्ति तत्काल फिर्ता लिन सांसदहरू समक्ष माग समेत गरेका छन् ।
सार्वजनिक पद धारण गरेका व्यक्तिहरूबाट आएको यस्ता अभिव्यक्तिबाट बजारको दुई खर्ब क्षति भएको आरोप छ । उक्त क्षति सम्बन्धित व्यक्तिबाट असुल उपर गराउने पर्ने उनीहरूको माग छ । उनीहरूले जथाभावी अभिव्यक्ति दिने कार्य बन्द गर्न भनेका छन् ।
