काठमाडौं । नेपाल स्टक एक्सचेन्ज (नेप्से)मा सूचीकृत थप दुई लघुवित्तको सेयर कारोबार रोक्का भएको छ ।
एकआपसमा मर्ज भई असार ३० गतेदेखि एकीकृत कारोबार गर्ने भएसँगै साधना लघुवित्त वित्तीय संस्था र सबैको लघुवित्त वित्तीय संस्थाको सेयर कारोबार रोक्का भएको हो ।
दुई लघुवित्तले अब ‘सम्पदा लघुवित्त वित्तीय संस्था लिमिटेड’को नामबाट एकीकृत कारोबार सुरु गर्ने छन् । अब यही नयाँ नामबाट दुवै लघुवित्तको सेयर कारोबारमा आउने छ ।
दुई लघुवित्तलाई एक आपसमा गाभिन राष्ट्र बैंकले जेठ २९ गते अन्तिम स्वीकृति दिएको थियो । दुई लघुवित्तले गत वैशाख १२ गते मर्जर सम्बन्धी अन्तिम र २०८० भदौ १५ गते प्रारम्भिक सम्झौता गरेका थिए ।
दुई लघुवित्त समान हैसियत अर्थात १ः१ सेयर अनुपातमा मर्ज हुन लागेका हुन् । हाल साधनाको चुक्ता पूँजी ३८ करोड २२ लाख रुपैयाँ र सबैको लघुवित्तको ३१ करोड ८६ लाख रुपैयाँ रहेको छ । मर्जरपछि एकीकृत चुक्ता पूँजी ७० करोड ८ लाख रुपैयाँ पुग्नेछ ।
