काठमाडौं । नक्कली सवारी चालक अनुमति पत्र (लाइसेन्स) बनाउने यातायात कार्यालयका प्रमुखसहित १५ जना विरुद्ध मुद्दा दायर भएको छ ।
सोमबार जिल्ला सरकारी वकिल कार्यालय काठमाडौंले यातायात व्यवस्था कार्यालय, बुटवलका तत्कालीन प्रमुख केशव अर्यालसहित १५ जना विरुद्ध मुद्दा दायर गरेको हो ।
यातायात व्यवस्था विभाग मीनभवनको पत्रपछि प्रहरीको केन्द्रीय अनुसन्धान ब्यूरो (सीआइबी)ले उनीहरू विरुद्ध मुद्दा दायर भएको हो ।
सीआइबीले कम्प्युटर अपरेटर पदमराज आचार्य, अधिकृत सुवास पौडेल, राजेश लम्साल, कम्प्युटर अपरेटर दिलिपकुमार साह, केशव पौडेल विरुद्ध मुद्दा दर्ता गराएको हो । हाल उनीहरू सीआइबीको हिरासतमा छन् ।
त्यसैगरी, नारायणप्रसाद पाण्डे, विवेक भण्डारी, विजय चौधरी, लक्ष्मण पाण्डे, रामकृष्ण श्रेष्ठ, विनोद भण्डारी, ज्ञानराज पाण्डे, प्रविन भन्ने फानेश्वर सापकोटा र सन्दीप श्रेष्ठविरूद्ध मुद्दा दायर भएको हो।
सीआइबीले हाल नक्कली लाइसेन्स बारे अनुसन्धान गरेको छ । यातायातका कर्मचारीले ढड्डामा फर्जी विवरण हालेर गैरकानुनी रुपमा नक्कली लाइसेन्स वितरण गर्ने गरेको अनुसन्धानबाट खुलेको थियो ।
सीआइबीको अनुसन्धान अनुसार देशभरका यातायात कार्यालयबाट १ लाख बढी नक्कली लाइसेन्स जारी भएको देखिएको छ ।एउटै लाइसेन्सका लागि १ लाख रुपैयाँसम्म असुल्ने गरेको पाइएको सीआइबीले जनाएको छ ।
