काठमाडौं । सेयर बजारमा सामान्य अंकको वृद्धि भएको छ । अघिल्ला दुई दिनमा ६३ अंकले बढेको नेप्सेमा आज करिब ४ अंकले बढेको हो ।
आज बजार खुलेदेखि लगातार ओरालो लागेको नेप्से अन्त्यमा हरियो भएर बन्द भएको हो । सोमबार राति संसदका दुई ठूला दल नेपाली काँग्रेस र नेकपा एमाले मिलेर नयाँ सरकार बनाउने सहमति भएसँगै हिजाे नेप्सेमा ४७ अंकको उछाल आएको थियो ।
बुधबार नेप्से परिसूचक ३.७९ अंकले बढेर २१०४.२२ बिन्दुमा पुगेको छ । सूचकसँगै कारोबार रकममा पनि सुधार आएको छ । अघिल्लो दिनको तुलनामा कारेबार रकम ५१ करोड रुपैयाँले बढेर ५ अर्ब ८ करोड रुपैयाँ पुगेको छ ।
आज ३१४ कम्पनीको १ करोड ७१ लाख ३४ हजार ८२ कित्ता सेयर किनबेच भएको छ ।
कारोबारमा आएका १३ वटा समूहमध्ये ५ समूहको परिसूचक बढेको छ भने ८ को घटेको छ । फाइनान्स र व्यापार समूहकाे परिसूचकमा उछाल आएको छ । यी दुवै समूहको परिसूचक ६ प्रतिशतभन्दा धेरैले बढेको छ ।
आज मञ्जुश्री फाइनान्सको सर्वाधिक कारोबार भएको छ । यसको २३ करोड १ लाख रुपैयाँ बढीको ३ लाख ९७ हजार ३०६ कित्ता सेयर किनबेच भएको छ । सर्वाधिक कारोबार हुने शीर्ष ५ कम्पनीमा सबै फाइनान्स नै रहेका छन् ।
कारोबारमा आएका मध्ये १०१ कम्पनीको सेयर मूल्य बढेको छ भने १३६ कम्पनीको घटेको छ ।
बढ्दोे बजारमा आज ४ फाइनान्स कम्पनीको सेयर मूल्यमा पोजेटिभ सर्किट लागको छ । सेन्टर र आइसीएफसी फाइनानसको सेयर मूल्य ठ्याक्कै १० प्रतिशतले बढेको छ । त्यस्तै, गृह्येश्वरी मर्चेन्ट र मञ्जुश्री फाइनान्सका सेयरधनीले पनि करिब १० प्रतिशत कमाएका छन् ।
आज चिरख्वा हाइड्रोपावरका सेयरधनीले सबैभन्दा धेरै ४.७० प्रतिशत गुमाएका छन् ।
