काठमाडौं । बैंकिङ प्रणालीमा अधिक तरलता कायम हुँदा कर्जा निक्षेप अनुपात (सीडी रेसियो) ८० प्रतिशतभन्दा तल झरेको छ
नेपाल राष्ट्र बैंकको पछिल्लो तथ्यांक अनुसार गत बुधबार समग्रमा बैंक तथा वित्तीय संस्थाको सीडी रेसियो ७९.८३ प्रतिशतमा झरेको हो ।
बैंकिङ प्रणालीमा एकोहोरो निक्षेप बढिरहने तर कर्जाको माग बढ्न नसक्दा सीडी रेसियो सीमाभन्दा निकै तल आएको हो । राष्ट्र बैंकले सीडी रेसियो ९० प्रतिशत तोकेको छ ।
अर्थतन्त्रमा आएको संकुचन र व्यवसायीको मनोवल बढ्न नसक्दा ब्याजदर सस्तिँदा समेत कर्जाको माग बढ्न सकेको छैन । साथै, बैंकहरू पनि कर्जा विस्तारभन्दा असुलीमा केन्द्रित हुँदा ऋण लगानी हुन सकेको छैन ।
बैंकिङ प्रणालीमा अधिक तरलता कायम हुँदा त्यसलाई व्यवस्थापन गर्न राष्ट्र बैंक र बैंकहरुलाई हम्मेहम्मे परेको छ । बैंकहरूले स्थायी निक्षेप सुविधा प्रगोग गर्दै ३ प्रतिशत ब्याजदरमै राष्ट्र बैंकमा पैसा राखिरहेका छन् भने राष्ट्र बैंकले हप्तैपिच्छे अर्बौं तरलता खिचिरहेको छ । अहिले बैंकिङ प्रणालीमा ६ खर्ब रुपैयाँ बढी तरलता कायम छ ।
चालु आवको जेठसम्म बैंकिङ प्रणालीमा साढे ४ खर्ब रुपैयाँ निक्षेप थपिएको छ भने त्यसको आधा मात्रै अर्थात् सवा २ खर्ब रुपैयाँ मात्रै कर्जा लगानी भएको छ । नेपाल राष्ट्र बैंकले चालु आवमा निजीक्षेत्र तर्फ ११.५ प्रतिशत कर्जा विस्तारको लक्ष्य राखे पनि हालसम्म ४.७ प्रतिशत मात्रै विस्तार भएको छ । यसले चालु आवमा कर्जा विस्तारको लक्ष्य समेत नभेटिने देखिन्छ ।
