काठमाडौं । बंगलादेश सरकारले नेपालबाट ४० मेगावाट बिजुली आयात गर्ने प्रस्ताव स्वीकृत गरेको छ ।
मंगलबार बंगलादेशका अर्थमन्त्री अब्दुल हसन मोहम्मद अलीको अध्यक्षतामा बसेको सार्वजनिक खरिदसम्बन्धी मन्त्रिमण्डलीय समिति (सीसीजीपी)को बैठकले नेपालबाट ४० मेगावाट विद्युत् आयात गर्ने निर्णय गरेको हो ।
उक्त बैठकले विभिन्न १५ वटा प्रस्तावहरू पारित स्वीकृत गरेको मन्त्रिपरिषद् महाशाखाका सचिव (सन्वय तथा सुधार) मोहम्मदुल हुसेन खानले जानकारी दिएको बंगलादेशी संचारमाध्यमले उल्लेख गरेका छन् ।
पावर डिभिजनको प्रस्तावपछि नेपाल विद्युत प्राधिकरण, एनटीपीसी विद्युत व्यापार निगम लिमिटेड र बंगलादेश पावर डेभलपमेन्ट बोर्ड (बीपीडीबी) बीच त्रिपक्षीय सम्झौता अनुसार बीपीडीबीले नेपालबाट ५ वर्षका लागि ४० मेगावाट जलविद्युत आयात गर्ने उनले बताए ।
‘विद्युत् विभागको प्रस्तावपछि बंगलादेश पावर डेभलपमेन्ट बोर्डले नेपालबाट ४० मेगावाट बिजुली आयात गर्नेछ । एनटीपी विद्युत् व्यापार निगम, नेपाल विद्युत् प्राधिकरण र बीपीडीबी बीच त्रिपक्षीय सम्झौता पछि मात्रै विद्युत् आयात सुरू हुनेछ,’ उनले भने ।
त्रिपक्षीय सम्झौतापछि मात्रै विद्युत् आयात सुरू हुने भनिए पनि नेपाल र बंगलादेश बीच सम्झौता हुने मिति भने तय भएको छैन ।
महाशाखा सचिव खानका अनुसार बंगलादेशले नेपालबाट प्रतियुनिट ८.१७ बंगलादेशी टाका (९.३० नेपाली रुपैयाँ)मा विद्युत् खरिद हुनेछ ।
नेपालको बिजुली बंगलादेशले भारतको ग्रीड (प्रसारण लाइन) हुँदै लैजाने भएको छ । बंगलादेशले भारतलाई ग्रीड प्रयोग बापतको शुल्क तिर्नुपर्ने भए पनि मूल्य तय भइसकेको छैन ।
बिजुली आयातलाई सहज बनाउन बीपीडीबीले ६ अर्ब ५० करोड बंगलादेशी टाका (७ अर्ब ३९ करोड रुपैयाँ) को ५ वर्षे आयोजना सुरू गरेको उनले बताए ।
गत फागुनमा नेपाल विद्युत् प्राधिकरण र बङ्गलादेश पावर डेभलपमेन्ट बोर्ड (बीपीडीबी) बीच यही वर्षायामदेखि बङ्गलादेशमा विद्युत् निर्यात सहमति भएको थियो । नेपालले ढल्केबर–मुजफ्फपुर ४०० केभी अन्तरदेशीय प्रसारण लाइनमार्फत भारतको बरमपुर–भेरामारा प्रसारण लाइनबाट विद्युत निर्यात गर्नेछ ।
प्राधिकरणले हरेक वर्ष जुन १५ देखि नोभेम्बर १५ तारिखसम्म वर्षायामका ६ महिनामा ४० मेगावाटसम्म विद्युत् निर्यातका लागि बङ्गलादेशसमक्ष प्रस्ताव पठाएको थियो ।
त्यसअघि भारतको प्रसारण प्रणाली प्रयोग गर्दै नेपालबाट ४० मेगावाट बिजुली बङ्गलादेश निर्यात गर्न भारतको विद्युत् आयात निर्यात निर्देशिका बमोजिम नेपाल विद्युत् प्राधिकरण, भारतको एनटीपिसी विद्युत् व्यापार निगम र बंगलादेशको पावर डेभलपमेन्ट बोर्ड बीच त्रिपक्षीय सम्झौता भएको थियो ।
यस्तै, बङ्गलादेशले ६७८ मेगावाट क्षमताको सुनकोशी तेस्रो जलविद्युत आयोजना निर्माण गर्ने बताइहेको छ । उसले सन् २०४० सम्म १० हजार मेगावाट बराबरको बिजुली लैजान सैद्धान्तिक प्रतिबद्धता जनाएको छ ।
भारतले निर्माण गर्ने माथिल्लो कर्णाली जलविद्युत् आयोजनाबाट ५०० मेगावाट बिजुली लैजान यसअघि नै बङ्गलादेश सहमत भएको थियो ।
